Innlent

Sindri Þór dæmdur í fjögurra og hálfs árs fangelsi

Birgir Olgeirsson skrifar
Þorgils Þorgilsson lögmaður ásamt Sindra Þór Stefánssyni.
Þorgils Þorgilsson lögmaður ásamt Sindra Þór Stefánssyni. FBL/ERNIR

Sindri Þór Stefánsson var dæmdur til fjögurra og hálfs árs fangelsisvistar í Héraðsdómi Reykjaness í dag vegna Bitcoin-málsins svokallaða. Dómur var kveðinn upp klukkan 14:30. 

Málið varðar stórfelldan þjófnað á tölvubúnaði úr gagnaverum í Reykjanesbæ og Borgarnesi í desember 2017 og janúar 2018, en tölvurnar voru notaðar til að grafa eftir rafmyntinni Bitcoin.

Sjö voru ákærðir í málinu og hlutur þeirra misstór í þessum innbrotum en samkvæmt ákærunni voru 2.250 tölvuíhlutum stolið. Þar á meðal 350 bitcoin-tölvum, hátt í 500 aflgjöfum og spennum, yfir 800 skjákortum, 120 móðurborðum og jafnmörgum örgjörvum. Andvirði búnaðarins sé um 96 milljónir króna en tjón fyrirtækjanna er talið nema 135 milljónum. Búnaðurinn er enn ófundinn.

Matthías Jón Karlsson var dæmdur í tveggja og hálfs árs fangelsi, Hafþór Logi Hlynsson fékk 20 mánaða fangelsisdóm, Pétur Stanislav Karlsson og Viktor Ingi Jónasson fengu 18 mánaða fangelsisdóm.

Ívar Gylfason fékk 15 mánaða fangelsisdóm en þar af eru tólf mánuðir skilorðsbundnir. Kjartan Sveinarsson fékk sex mánaða dóm, skilorðsbundinn til tveggja ára.

Þá var Advania dæmdar 33 milljónir króna í skaðabætur.

Um málið

Við upphaf aðalmeðferðar málsins í Héraðsdómi Reykjaness í desember síðastliðnum játaði Sindri Þór að hafa farið inn í gagnaverið í Borgarnesi 15. desember árið 2017 og gagnaver Advania 16. janúar í fyrra. Hann neitaði þó að hafa haft nokkuð með skipulagningu og undirbúning innbrotanna að gera.

Annar af þeim sem voru ákærðir í málinu, Matthías Jón Karlsson, játaði einnig við upphaf aðalmeðferðarinnar að hafa brotist inn í gagnaver Advania en sagðist ekki hafa undirbúið, lagt á ráðin eða skipulagt innbrotið. Sindri Þór og nokkrir af þeim sem ákærður voru létu í það skína við aðalmeðferð málsins að aðrir hefðu verið höfuðpaurar í þessu máli og að hinir ákærðu í málinu hefðu verið undir þrýstingi frá þeim. Vildu þeir hins vegar ekki gefa upp hverjir það ættu að vera. Alda Hrönn Jóhannsdóttir, saksóknar embættis lögreglustjórans á Suðurnesjum, sagði að það væri ekkert sem sýndi fram á það og þeir einir sem ákærðir voru hefðu komið að skipulagningu. 

Sindri Þór var ákærður fyrir stórfelldan þjófnað með því að hafa brotist inn í gagnaver Algrim Consulting og BDC Mining við Heiðartröð á Ásbrú. Einnig fyrir að hafa farið inn í gagnaver Advania og gagnaver í Borgarnesi ásamt tveimur tilraunum til innbrots í BDC Mining. Ákæruvaldið hafði farið fram á að Sindri yrði dæmdur til fimm ára fangelsisvistar óskilorðsbundið.

Matthías Jón Karlsson hefur játað að hafa farið inn í gagnaver Advania en neitar sök í ákæru þar sem honum er gefið að sök innbrot í BDC Mining, AVK gagnaverið í Borgarnesi og tvær tilraunir til innbrots í BDC Mining. Ákæruvaldið fór fram á að Matthías yrði dæmdur til þriggja ára fangelsisvistar óskilorðsbundið.

Pétur Stanislav Karlsson sem var ákærður fyrir að brjótast inn í gagnaver BDC Mining og Algrim Consulting, tilraun til innbrots í BDC Mining og að brjótast inn í gagnaver Advania. Ákæruvaldið fór fram á að hann yrði dæmdur til að minnsta kosti tveggja ára óskilorðsbundinnar fangelsisvistar.

Ívar Gylfason var ákærður fyrir að aðild að skipulagningu, undirbúning innbrotsins í Advania. Ívar var öryggisvörður hjá Öryggismiðstöðinni og er sakaður um að hafa látið innbrotsþjófana öryggiskóða til að komast inn í gagnaverið, teikningu af gagnaverinu og fatnað frá Öryggismiðstöðinni. Ákæruvaldið fór fram á tveggja ára fangelsisvist yfir honum.

Viktor Ingi Jónasson var ákærður fyrir að brjótast inn í gagnaverið í Borgarnesi, tilraun til innbrots í gagnaver BDC Mining aðfaranótt annars dags jóla og fyrir skipulagningu og undirbúning innbrotsins í Advania- gagnaverið. Ákæruvaldið fór fram á að hann yrði dæmdur til tveggja ára fangelsisvistar.

Hafþór Logi Hlynsson var ákærður fyrir að hafa skipulagt, undirbúið og lagt á ráðin varðandi innbrotið í Advania-gagnaverið. Fór Alda Hrönn fram á þriggja ára óskilorðsbundna fangelsisvist yfir Hafþóri og sagði að líta yrði til þess að hann hefði langan afbrotaferil að baki sem vöruðu ofbeldis- og fíkniefnalagabrot. Nú síðast var hann dæmdur árið 2018.

Kjartan Sveinarsson var ákærður í málinu fyrir að hafa komið á samskiptum á milli Matthíasar Jóns og Hafþórs Loga við Ívar Gylfason. Fór Alda Hrönn fram á sex mánaða fangelsisvist yfir Hirti og lagði það í mat dómara hvort að skilorðsbinda ætti þá refsingu eða ekki.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.