Óvissa með Rashford, Maguire og Lindelöf

Óvíst er með þátttöku Marcus Rashford, Harry Maguire og Victor Lindelöf í leik Manchester United og Bournemouth á morgun.

Ole Gunnar Solskjær sagði á blaðamannafundi í dag að of snemmt væri að segja til um hvort þremenningarnir myndu ferðast með United niður á suðurströndina.

Allir þrír meiddust lítillega í sigrinum á Chelsea í 16-liða úrslitum enska deildarbikarsins.

„Þeir fóru í meðferð í gær og tóku þátt í léttri æfingu í dag. Vonandi eru þeir tilbúnir, en ég get ekki sagt til um það núna,“ sagði Solskjær.

Rashford hefur verið einn helsti markaskorari United í síðustu leikjum, en hann hefur skorað fjögur mörk í síðustu fjórum leikjum sínum.

Paul Pogba er áfram á meiðslalistanum og er ekki búist við honum aftur fyrr en eftir landsleikjahléið um miðjan mánuðinn. Sami tímarammi er á Nemanja Matic, Luke Shaw og Axel Tuanzebe.