Liðsfélagi Gylfa orðaður við PSG

Franska blaðið L'Equipe segir frá því að liðsfélagi Gylfa Þórs Sigurðssonar hjá Everton sé mögulega á leiðinni til franska stórliðsins Paris Saint Germain.

Samkvæmt frétt franska blaðsins þá er Idrissa Gueye búinn að vera að leita sér að húsi í París.

Everton vill fá 27 milljónir punda fyrir þennan 29 ára gamla varnartengilið. Senegalinn hefur spilað með Everton frá árinu 2016.

Le PSG s'active pour boucler rapidement le dossier du milieu sénégalais d'Everton Idrissa Gueye, qui a échangé mercredi avec Thomas Tuchel et pour lequel Pini Zahavi a été mandaté https://t.co/aZqSVP4Rhnpic.twitter.com/tM7f7gW7r5

— L'ÉQUIPE (@lequipe) January 13, 2019

Thomas Tuchel, knattspyrnustjóri PSG, hefur mikinn áhuga á því að fá Idrissa Gueye í janúarglugganum.

Paris Saint Germain er með örugga forystu í frönsku deildinni en mætir Manchester United í sextán liða úrslitum Meistaradeildarinnar.

Idrissa Gueye kom til Everton frá Aston Villa í ágúst 2016 en Everton nýtti sér þá klausu í samningi Gueye þegar Aston Villa féll úr ensku úrvalsdeildinni. Everton gat þá keypt upp samning hans fyrir 7,1 milljón punda.

Gueye lék síðast í Frakklandi tímabilið 2014-15 en hann var hjá Lille í sjö ár.

Idrissa Gueye hefur spilað fyrir aftan Gylfa á miðju Everton í vetur en hann hefur byrjað 18 af 22 leikjum liðsins í ensku úrvalsdeildinni á þessu tímabili.

Það er ljóst að Everton mun sakna Idrissa Gueye en sem dæmi um mikilvægi hans má nefna það staðreynd að liðið fékk á sig samtals níu mörk í síðustu tveimur deildarleikjum án Gueye.