Rændur á sínum eigin fatamarkaði

Jörmundur Ingi Hansen fyrrum allsherjargoði Ásatrúarfélagsins og núverandi forstöðumaður Reykjavíkurgoðorðs var rændur á sunnudaginn og hafði ræninginn 120 þúsund krónur úr krafsinu. Oddur F. Helgason, betur þekktur sem Oddur „spekingur“ hjá ORG-ættfræðiþjónustu, greinir frá ráninu á Facebook síðu sinni.



Jörmundur, sem er 77 ára gamall, var staddur á fatamarkaðnum sem hann rekur í kjallara hússins við Laugaveg númer 25 þegar ránið átti sér stað. Oddur segir frá því að afbrotið hafi nú þegar verið kært til lögreglu en hann hefur komið af stað söfnun fyrir Jörmund til þess að bæta honum tjónið.

Maðurinn sem rændi Jörmund var á fatamarkaðnum að skoða jakka og þegar komið var að því að greiða fyrir jakkann þá hrifsaði hann peningabúnt úr höndum Jörmundar. Jörmundur var með 120 þúsund krónur í reiðufé sem hann ætlaði að verja í leigu á húsnæðinu við Laugaveg.

Á leið til Danmerkur í rannsóknarleiðangur fyrir ORG

Jörmundur Ingi er á leið til Danmerkur í næsta mánuði, meðal annars til þess að sinna rannsóknum fyrir ORG-ættfræðiþjónustu. „Kemur þetta rán sér sérlega illa fyrir þar sem þetta setur allt í óvissu, ekki síst vegna þess að lítið innstreymi er í verslun hans og erfitt verður að ná þessari upphæð fljótlega aftur,“ segir Oddur í stöðuuppfærslu sinni.

Jörmundur hefur rekið fatamarkaðinn á Laugavegi 25 síðastliðin ár en þar selur hann notuð föt sem honum hefur áskotnast með ýmsum hætti. Hann tekur ekki við fötum nema þau séu alveg í lagi, og helst aðeins úr 100 prósent ull.

Jörmundur sagði frá því í viðtali við Vísi árið 2016 að hann hagnist nú ekki mikið á fatasölunni enda sé tilgangurinn ekki sá að græða á henni. Honum þyki einfaldlega gaman að hjálpa mönnum að klæða sig því tískan í dag er honum ekki til geðs. „Meira að segja Bjarni Ben lítur út eins og Angela Merkel í þessum fötum. Ef ég get aðeins lagfært þetta er ég mjög ánægður,“ sagði Jörmundur.

„Við í ORG viljum efla til söfnunar til þess að geta styrkt samstarfsmann okkar, meðal annars til að tryggja það að hann eigi leigu nokkra mánuði aftur í tímann og geti athafnað sig í Danmörku til að sinna þeirri rannsókn sem lagt var upp með,“ segir Oddur á Facebook.