Tveir leikir verða spilaðir í ensku úrvalsdeildinni í dag. Arsenal ætti að geta náð sér í nokkuð auðveldan sigur á meðan Liverpool fær stóra prófraun á Anfield þegar meistaraefnin í Manchester City mæta í heimsókn.
Arsenal sækir lið Bournemouth heim en Arsene Wenger og félagar verða að ná sér í sigur til þess að halda sér í baráttunni um eitt af fjórum efstu sætunum.
Bournemouth er í harðri baráttu í neðri hluta deildarinnar, en pakkinn frá 10. sæti og niður á botninn er mjög þéttur.
Arsenal hefur gert þrjú jafntefli í síðustu fjórum leikjum sínum og hefur ekki tapað síðan liðið lá fyrir Manchester United á heimavelli í byrjun desember.
Stórleikur umferðarinnar fer svo fram á Anfield í Liverpool þar sem heimamenn taka á móti Manchester City. Þegar þessi lið mættust á Etihad vellinum í september tók City Liverpool í kennslustund og valtaði yfir þá 5-0.
Liverpool er á góðu skriði og hefur ekki tapað í síðustu 13 deildarleikjum sínum. City hefur hins vegar ekki tapað deildarleik á tímabilinu.
Sigur væri mjög verðmætur fyrir Klopp og félaga, á meðan Pep Guardiola má alveg við því að tapa þessum leik, City er í raun búið að vinna deildina þó tölfræðilega sé enn möguleiki á öðru. Það þýðir hins vegar ekki að hann vilji tapa, hér mætast tvö sókndjörf lið og verður líklegast skotsýning á Anfield.
Leikir dagsins:
13:30 Bournemouth - Arsenal, beint á Stöð 2 Sport
16:00 Liverpool - Manchester City, beint á Stöð 2 Sport
Enski boltinn
