Hefur áhyggjur af gæðum kennslu og rannsókna í íslenskum háskólum

Hermundur Sigmundsson, prófessor í lífeðlislegri sálfræði við Háskólann í Þrándheimi í Noregi, segir háskólakerfið á Íslandi ekki nógu stórt til að halda úti marga háskóla og að ekki sé nægilega mikið af fræðimönnum. Hermundur var gestur í Sprengisandi á Bylgjunni í dag.

„Hvernig stendur á því að við erum með svona marga skóla? Fyrir þá sem koma frá stærri þjóðfélögum lítur þetta mjög sérkennilega út og ég velti fyrir mér hvort við höfum nógu mikið af fræðimönnum til að vinna við alla þessa háskóla og hvort við getum boðið upp á sama nám í þeim öllum. Svarið mitt er nei. Háskólakerfið er ekki nógu stórt og við höfum ekki nægilega marga fræðimenn í þetta,“ segir Hermundur.

Þá segir hann það að hafa góða fræðimenn sé algjört lykilatriði. „Ég hef áhyggjur af gæði þeirrar kennslu sem við erum að bjóða upp á og gæði rannsókna. Ætlum við að halda áfram að hafa sér íslenskt matskerfi á ráðningu á starfsfólki og hvernig framgangur er metinn eða ætlum við að skoða hvernig þetta er gert í öðrum löndum í kringum okkur?,“ spyr hann.

„Hérna sér maður prófessora sem hafa aldrei skrifað vísindagrein í alþjóðlegt tímarit. Það myndi ekki þekkjast á Norðurlöndunum að fólk fái að starfa sem prófessor án þess að hafa gert eina alþjóðlega vísindagrein. Þetta er mjög sérstakt kerfi.“

Hann bendir á að hann vinni við 39.000 manna háskóla og þrátt fyrir að Háskólinn í Álasundi sé talsvert langt frá Þrándheimi hafi hann hafið samstarf til að efla gæði námsins. „Samkeppni má aldrei koma niður á gæðum og ég held að það væri heppilegt að hafa einn til tvo sterka háskóla hér á landi,“ segir hann.