Telja efnafólki hyglað á kostnað gamalmenna í Garðabæ

„Það lítur út fyrir að bæjastjórnin ætli að fórna hagsmunum okkar gamalmennanna til að þóknast efnafólkinu í þessu nýja prýðishverfi,“ segir Gunnar H. Jónsson, íbúi í Naustahlein í Garðabæ.

Í Hleinum eru tvær götur með raðhúsum fyrir sextíu ára og eldri. Hefðbundin leið þangað er um gamla Álftanesveginn fram hjá Prýðahverfi. Eins og komið hefur fram í Fréttablaðinu ætla bæjaryfirvöld í Garðabæ að loka umferð um gamla Álftanesveginn inn á Herjólfsbraut þar sem hún liggur í suður inn í Hafnarfjörð og í átt að Vöngunum í Hafnarfirði þar ofan við og svo að Hleinum í Garðabæ þar vestan við. Suður af Hleinum er Hrafnista, sem er Hafnarfjarðarmegin.

Fréttablaðið hefur sagt frá kæru hjóna í Heiðvangi til úrskurðarnefndar auðlinda- og umhverfismála vegna ákvörðunarinnar um vegalokunina. Í desember 2015 sendu íbúarnir í Hleinum í Garðabæ mótmælaskjal 78 íbúa, sem er 98 prósent þeirra sem búa þar. Mótmælin höfðu ekki áhrif.

Gunnar, ásamt Þórði M. Adólfssyni sem býr í Boðahlein, hefur verið fremstur í flokki að mótmæla lokuninni inn á Herjólfsbraut. Í svari Guðjóns E. Friðrikssonar bæjarritara til þeirra er útskýrt að ákveðið hafi verið áður en Prýðahverfi var byggt að loka gamla Álftanesveginum þannig að ekki yrði gegnumakstur um hverfið. Brýnt væri að þar yrði ekki þung umferð.

„Það hlýtur almennt að teljast mjög eðlilegt að beina ekki umferð um íbúðarhverfi sem á þangað ekki erindi,“ undirstrikar bæjarritarinn.

„Þetta finnst mér skjóta skökku við þegar bæjarstjórinn sjálfur ráðleggur okkur að aka í gegn um Miðvanginn í Hafnarfirði og þaðan út á Reykjavíkurveg,“ segir Gunnar um þessi rök.

Bærinn hefur bent íbúum Hleina á að hægt verði að aka gamla Álftanesveginn til vesturs út á Álftanes, þar inn á nýja Álftanesveginn og þá til austurs að miðbæ Garðabæjar.

Gunnar og Þórður segja þetta ekki ásættanlega lausn. Fram og til baka þýði þetta meira en 5 kílómetra aukaakstur miðað við núverandi leið. Þess utan séu gatnamótin við nýja Álftanesveginn stórhættuleg. Þá tefji lokun við Herjólfsbraut neyðarflutninga, meðal annars frá Hrafnistu,

„Fyrir menn sem eru með meira en milljón í mánaðarlaun skiptir kannski engu máli að aka einhverja Krísuvíkurleið að óþörfu en fyrir okkar hóp sem höfum kannski tvö hundruð þúsund krónur á mánuði munar um viðbótarkostnað sem því fylgir,“ segir Gunnar H. Jónsson.

Á opnum fundi Gunnars Einarssonar bæjarstjóra á miðvikudag þrýstu íbúar úr Prýðahverfi á bæjarstjórann að loka veginum strax en Gunnar minnti á að fyrrnefnd kæra er enn óútkljáð. Veginum yrði hins vegar lokað þegar niðurstaða þar er fengin.