Langþreytt á draugahúsi í eigu banka á Þórshöfn á Langanesi

„Maður er orðinn langþreyttur á þessu ófremdarástandi sem verið hefur svo lengi,“ segir Elías Pétursson, sveitarstjóri í Langanesbyggð, um stórt hús á Þórshöfn sem stendur autt og er heimamönnum þyrnir í augum.

Elíasi var á síðasta fundi sveitarstjórnar Langanesbyggðar falið að ræða við eigendur Langanesvegar 2 um framtíðarnotkun hússins þar sem upphaflega var byggingavöruverslun Kaupfélags Langnesinga en hefur hýst ýmsa aðra starfsemi í gegn um tíðina, meðal annars fánaverksmiðju. Það er byggt 1980, er alls 543 fermetrar og hefur verið ónotað um árabil.

Félagið Lónshöfn ehf., sem eignaðist húsið 2003, var selt til nýrra aðila sem árið 2013 fengu leyfi til að innrétta þar sex íbúðir auk þjónusturýmis. Framkvæmdir hófust undir verkstjórn Gunnólfs Lárussonar sem verið hafði sveitarstjóri er leyfi fékkst fyrir breytingunni. Lónshöfn fór hins vegar á höfuðið á árinu 2016 án þess að verkinu væri lokið. Þá yfirtóku Landsbankinn og Byggðastofnun, húsið og hafa síðan reynt árangurslaust að koma því í verð.

Fram kemur í fundargerð að lagðar hafi verið dagsektir á eigendur hússins vegna ástandsins en að þeir hafi andmælt sektunum. Elías segir eigendurna ekki hafa greitt sektirnar til þessa en að þeir hafi reyndar lagað nokkuð til í kring um húsið. Fram undan sé að ræða við þá um framtíðina.

„Við viljum einfaldlega að húsið sé ekki svona ljótt,“ segir Elías. „Húsið er algjörlega í miðbænum miðjum og það þýðir að við viljum helst fá einhverja starfsemi í það sem fylgir eitthvert líf. Þannig að húsið líti vel út og að í því sé starfsemi sem nýtist sveitarfélaginu eða samfélaginu. Það getur verið blanda af íbúðum og skrifstofuhúsnæði,“ segir Elías. „Það gæti verið að sveitarfélagið komi einhvern veginn þannig að málum að það sé hægt að koma þessu á hreyfingu en það verður þó aldrei gert þannig að skattfé verði notað til að leysa einhvern úr snörunni,“ undirstrikar sveitarstjórinn.