Strætó lækkar aldursmörk fyrir eldriborgaraafslátt aftur í 67 ár

Stjórn Strætó bs. ákvað á fundi sínum í gær að færa aldursmörk fyrir eldriborgaraafslátt fyrirtækisins aftur niður í 67 ár úr 70 árum. Heiða Björg Hilmisdóttir, stjórnarformaður Strætó bs., segir að stjórnin hafi verið sammála um að breytingin væri sanngjörn og hún mun koma til framkvæmda strax.

Fréttablaðið fjallaði um misræmið í aldursmörkum í vikunni en það var árið 2011 sem viðmiðið fyrir eldriborgaraafslátt var hækkað úr 67 árum í 70. Þannig hefur það verið síðan í strætó á meðan aðrar aldurshækkanir hafa gengið til baka. Fólk á aldrinum 67-69 ára hefur því talist til eldri borgara víðast hvar annars staðar í þjóðfélaginu nema í strætó. Þá hefur misræmið skapað vandamál fyrir öryrkja sem teljast til eldri borgara við 67 ára aldur og hefðu því tæknilega séð átt að greiða fullt fargjald í þrjú ár til sjötugs.

Stjórn Strætó skoðaði að lækka aldursmörkin aftur í 67 ár áður en gjaldskrá ársins 2018 var samþykkt en ákveðið var að fresta því þar sem stjórnin vildi vita hvað slík aðgerð myndi kosta.

„Mér finnst alveg sjálfsagt að fólk verði eldri borgarar á sama aldri alls staðar og okkur fannst sjálfsagt að kippa þessu í lag og vonum að þetta verði til að fleiri nýti sér strætó.“

Heiða segir breytinguna einfalda allt og loka á þær glufur sem hækkunin myndaði á sínum tíma. Aðspurð hvort stjórnin hafi fengið upplýsingar um kostnaðinn við þessar breytingar segir Heiða að þær upplýsingar hafi fengist að ekki væri hægt að áætla það.

„Við vitum ekki hvað fólk er gamalt sem kaupir fullorðinsmiða og það er ekki hægt að áætla kostnaðinn, að sama skapi eru engar tölur um hvað þessi breyting sparaði á sínum tíma. En við erum á því að þetta sé sanngjarnt.“