Kísilverksmiðja keppir við eldbakaðar pitsur

Húsvíkingar gætu fundið fyrir mengun í allt að sextán daga við gangsetningu kísilverksmiðju PCC á Bakka við Húsavík. Ofnarnir tveir verða ekki gangsettir á sama tíma og munu stjórnendur verksmiðjunnar reyna að gangsetja ofnana í sunnanvindi til að verja íbúa Húsavíkur.

Framkvæmdastjóri PCC segir ekki hægt að bera verkefni fyrirtækisins á Húsavík saman við hrakfarir kísilversins í Helguvík.

Fjölmenni mætti á opinn íbúafund sem PCC BakkiSilikon hf. hélt á Fosshóteli á Húsavík í gær. Íbúar bæjarins eru að mestu jákvæðir í garð framkvæmdarinnar. 

Einkum spurðu íbúar um almenningssamgöngur til og frá verksmiðjunni og um loftgæði. Ekki er útilokað að íbúar með undirliggjandi astma sem búa næst verksmiðjunni muni finna fyrir einkennum á meðan á gangsetningu stendur.

Framleidd verða um 32 þúsund tonn árlega í verksmiðjunni en virði þeirra afurða er á mörkuðum í dag um 57 milljarðar króna. Í framleiðsluna verða notuð um 60 þúsund tonn af kolum á ári og annað eins af innfluttum viði.

Stjórnendur PCC hafa átt í viðræðum við íslenska skógarbændur til að geta nýtt einnig íslenskan við og minnka þar með vistspor framleiðslunnar.

„Við höfum verið í viðræðum við nokkra bændur. En vinsældir eldbakaðra pitsa hafa þau áhrif að það er minna framboð á íslensku timbri. Pitsuofnar eru í samkeppni við okkar ljósbogaofna,“ segir Hafsteinn Viktorsson framkvæmdastjóri PCC.

„Varðandi gangsetningu þá fylgjumst við með veðurspánni og við vonum að veðurguðirnir verði okkur hliðhollir. Það er ekki hægt að bera saman verkefni okkar við Helguvík. Allir sem fylgst hafa með fréttum sjá að eitthvað mikið fór úrskeiðis þar. Við hins vegar höfum ákveðið að vanda okkur eftir fremsta megni. Einnig erum við með minni ofna sem eru auðveldari í rekstri.“

Um eitt hundrað starfsmenn hafa hafið störf í verksmiðjunni. Því er mikilvægt að fara að setja verksmiðjuna í gang að mati Hafsteins til að tekjur komi inn á móti útgjöldum. „Við hins vegar förum ekki af stað fyrr en við erum alveg öruggir með að allt okkar kerfi virki.“