Forsetinn óskar ungum skákkonum góðs gengis á HM

Það var glatt á hjalla á leikskólanum Laufásborg í morgun þegar Guðni Th. Jóhannesson, forseti Íslands, kom í heimsókn til að óska skáksveit leikskólans góðs gengis á heimsmeistaramóti barna í skák.

Fjórar stúlkur af leikskólanum fara á föstudag til Albaníu að keppa á mótinu. Omar Salama, skákkennari stúlknanna og foreldrar fara með í för og dvelja þau í Albaníu í tíu daga.

Guðni þakkaði stúlkunum fyrir bréfið sem hann fékk frá þeim. Þær skrifuðu forsetanum og buðu honum að koma í heimsókn á leikskólann.

„Kæri vinur forseti Íslands. Viltu heiðra okkur með nærveru þinni á morgun, miðvikudag?

Við erum 4 vinkonurnar, 5 ára, að fara á heimsmeistaramót barna í skák í Albaníu. 

Okkur langar að segja þér betur frá því,“ stóð meðal annars í bréfinu til forseta sem hann hafði með sér í heimsóknina.

Guðni óskaði Omari, þjálfara stúlknanna einnig til hamingju með árangurinn en þetta er í fyrsta skipti í sögunni sem leikskólabörn taka þátt á heimsmeistaramóti barna í skák. Stúlkurnar hafa æft stíft síðustu daga undir handleiðslu Omars.

Omar sagði það gaman fyrir stúlkurnar að forsetinn skyldi koma og styðja þær og sýna þeim hversu mikilvægt það sé að taka þátt í mótinu ekki aðeins fyrir hönd Íslands heldur líka fyrir þær sjálfar.

Guðni eyddi talsverðum tíma í að spjalla við stúlkurnar og fylgjast með þeim tefla. Þær létu ekkert á sig fá þrátt fyrir nærveru forsetans, fjölda ljósmyndara og tökuliðs sjónvarps.