Nemendur tjá sig með augunum

Klettaskóli hefur innleitt augnstýribúnað fyrir nemendur sem ekki geta tjáð sig með orðum. Tíu nemendur eru nú að læra að stjórna tölvumús með augunum sem gerir þeim kleift að tjá sig og vinna ýmis verkefni. Kennari við skólann segir dásamlegt að sjá hvað búnaðurinn gerir mikið fyrir börnin.

Klettaskóli fékk fyrsta augnstýribúnaðinn árið 2014 og hafa starfsmenn og nemendur verið að læra á hann síðan. Fyrir nokkru fékk skólinn fleiri tæki og hefur nú innleitt búnaðinn með aðstoð frá Öryggismiðstöðinni. Notast er við samskiptaforritið Toby comunicator.

„Við erum með augnstýribúnað í fjórum kennslustofum og við erum að reyna auka tjáskipti hjá þeim.  Þau læra að nota augun sín markvisst bæði með leikjum og setja saman stuttar setningar,“ segir Hanna Rún Eiríksdóttir, kennari í Klettaskóla.

Hún segir magnað að sjá hvernig börnin koma skilaboðum áleiðis. „Það er varla hægt að lýsa því með orðum en það er dásamlegt að fá að upplifa það að nemandinn segir mér eitthvað sem hefur meiningu. Það er alveg stórkoslegt,“ segir Hanna Rún.

Búnaðurinn nýtist í allskyns leiki og athafnir. Til að mynda geta börnin valið myndbönd til að horfa á, farið í leiki og valið tónlist til að hlusta á en tónlistarmaðurinn Frikki Dór virðist vera í algjöru uppáhaldi hjá Emmu eins og sjá má á myndskeiði sem fylgir fréttinni.

Í vetur hafa nemendur unnið myndverk með augnstýringunni og hafa skapað listaverk þar sem litir og form blandast saman. Myndirnar voru til sýnis síðustu helgi á barnamenningarhátíð og eru börnin afar stolt af myndunum.