Lil Wayne meðvitundarlaus á hótelherbergi

Bandaríski verðlaunarapparinn Lil Wayne var fluttur á spítala í nótt eftir að hafa fengið flogakast á hótelherbergi í Chicago. Að sögn TMZ var rapparinn meðvitundarlaus þegar sjúkraflutningamenn komu á vettvang.

Við komuna á sjúkrahús er hann sagður hafa fengið annað flogakast og staðfestir talsmaður hans í samtali við fjölmiðla ytra að köstin hefðu verið allmörg um nóttina.

Flogaköst Lil Wayne hafa áður ratað í fréttirnar. Þannig þurfti hann að fá aðhlynningu í fyrra eftir tvö minniháttar flogaköst og fyrir fjórum árum síðan varði hann nokkrum dögum á sjúkrahúsi af sömu ástæðu. Hann hefur í viðtölum greint frá því að hann sé flogaveikur.

Til stóð að Lil Wayne kæmi fram á tónleikum í gærkvöldi en þeir voru blásnir af vegna veikinda rapparans.