Leysibendli beint að þyrlu gæslunnar í flugi

Leysibendli var beint að þyrlu Landhelgisgæslunnar þegar hún var á flugi yfir íbúabyggð í Reykjavík í gærkvöldi. Þyrlan var á leið í útkall þegar atvikið varð og bar áhöfn þyrlunnar saman um að veruleg hætta hefði geta skapast. Þetta kemur fram í tilkynningu frá Landhelgisgæslunni.

Stjórnstöð Landhelgisgæslunnar barst beiðni frá læni í Vestmannaeyjum á níunda tímanum í gærkvöldi um að þyrla kæmi að sækja þangað sjúkling, en vegna lélegs skyggnis var ekki hægt að senda sjúkraflugvél.

Rétt fyrir klukkan tíu fór þyrlan TF-GNA í loftið og var leysibendlinum beint að henni stuttu síðar. Geislanum var beint á vinstri hlið vélarinnar í stutta stund og truflaði hann flugið því lítið. Áhöfn þyrlunnar ber hins vegar saman um að veruleg hætta hefði geta skapast hefði geislinn hitt á framrúðuna og blindað flugmennina.

TF-GNA lenti á Vestmannaeyjaflugvelli um 50 mínútum eftir brottför frá höfuðborginni en þar beið sjúkrabíll með sjúklinginn. Þyrlan lagði aftur af stað til Reykjavíkur klukkan ellefu og lenti hún á Reykjavíkurflugvelli um klukkan hálf tólf. Þaðan var sjúklingurinn fluttur á Landspítalann á Hringbraut. Þetta er í fimmta sinn á þessu ári sem Landhelgisgæslan sinnir sjúkraflugi til Vestmannaeyja.