Suu Kyi mætir ekki á fund allsherjarþingsins

Leiðtogi Mjanmar, Aung San Suu Kyi, hyggst ekki mæta á allsherjarþing Sameinuðu þjóðanna í næstu viku en hefð er fyrir því að þjóðarleiðtogar heimsins ávarpi þar samkomuna.

Mikil krísa á sér nú stað í Mjanmar þar sem um 370 þúsund íbúar landsins úr hópi minnihluta Rohingja múslima hafa flúið landið yfir til Bangladess.

Suu Kyi hefur verið harðlega gagnrýnd af stjórnvöldum Vesturlanda fyrir að hafa verið þögul yfir því ofbeldi sem hópurinn hefur orðið fyrir.

Átök Rohingja og mjanmarska hersins brutust út þegar skæruliðar Rohingja réðust á lögreglustöð í norðurhluta Rakhine og drápu tólf starfsmenn. Er herinn sagður hafa brugðist við af ofsa, brennt bæi Rohingja og ráðist á almenna borgara til þess að flæma þá úr landi.