Rannsaka eiginkonu forsetaframbjóðandans Fillon

Formleg rannsókn á Penelope Fillon, eiginkonu forsetaframbjóðandans Francois Fillon, er hafin i Frakklandi. Eiginmaður hennar er sakaður um að hafa greitt fjölskyldu sinni hundruð þúsunda evra af opinberu fé fyrir störf sem hún vann ekki.

Penelope Fillon var yfirheyrð í dag en opinber rannsókn hófst á Francois fyrr í þessum mánuði, að því er segir í frétt breska ríkisútvarpsins BBC.

Fillon er sakaður um að hafa greitt spúsu sinni eins og hún væri aðstoðarmaður sinn á þingi. Hún er hins vegar sögð hafa unnið lítið sem ekkert fyrir fénu, hún hafi ekki haft aðgang að þinghúsinu, fáir vissu af því að hún væri á meðal starfsmanna Fillon og þá hefur verið bent á misvísandi upplýsingar í skráningu á vinnutíma.

Áður en ásakanirnar komu upp var Fillon talinn líklegastur til að vinna forsetakosningarnar í Frakklandi. Nú mælist hann hins vegar með minna fylgi en Emmenuel Macron, frambjóðandi miðjuaflanna, og Marine Le Pen, frambjóðandi hægriöfgaflokksins Þjóðfylkingarinnar.

Fillon-hjónin neita bæði allri sök.