Skemmdarverk unnin á heimili villikatta

Mikil skemmdarverk hafa verið unnin á tímabundnu heimili nokkurra katta, sem samtökin Villikettir hafa lengi haft á sínum snærum. Rúður voru brotnar og hurð spennt upp en fimm kettir eru nú týndir. Samtökin greindu frá þessu á Facebook-síðu sinni í dag og sögðu aðkomuna á svæðinu skelfilega.

Fulltrúar samtakanna gerðu sér ferð í húsið í dag en ætlunin var að sækja þangað 6 ketti. Á tímabili höfðust um 70-80 kettir við í húsinu við slæmar aðstæður.

Í samtali við Vísi sagði Arndís Kjartansdóttir, ritari í stjórn Villikatta, að hræðilegt hafi verið um að litast á svæðinu.

„Við vissum ekkert af þessu. Við ætluðum að sækja þarna 6 kisur og höfum verið að nota þetta húsnæði sem algjört millibil. Við erum búnar að sækja 67 kisur og erum bara alveg að drukkna.“

Samtökin fengin til að bjarga rúmlega 70 köttum

Að sögn Arndísar er forsaga málsins sú að á heimili nokkru hafi komið upp mikil veikindi og heimilismenn verið í þann mund að missa húsnæði sitt. Í kjölfarið hafi þeir ekki treyst sér til að sjá um kettina sína. Staðsetningu er ekki hægt að gefa upp af trúnaðarástæðum en viðeigandi sveitarfélag bað samtökin Villiketti um aðstoð við björgun kattanna. Í fyrstu var haldið að um 30 ketti væri að ræða en fljótt kom í ljós að fjöldinn var nær 80.

Villikettir hafa nú bjargað 67 þeirra katta sem héldu til í húsinu en í dag átti að sækja þá sem eftir voru.

„Þegar við komum voru allar rúður brotnar og búið að brjóta upp hurðina og henni var svona hallað aftur með spýtu þegar við komum. Það áttu að vera sex kisur inni en þær voru tvær, hinar hafa allar farið út,“ segir Arndís.

„Þetta hefur verið svakalegt áfall fyrir þær. Við náðum annarri í búr en hin slapp út um brotna rúðu. Þær eru þá fimm einhvers staðar úti sem vonandi rata heim til sín.“

Ekki vitað hverjir voru að verki

Arndís segist ekki hafa neina hugmynd um hverjir hafa verið að verki en húsið er inni á læstu svæði. Hún segir þó að eftirlitsmyndavélar séu á svæðinu en rannsókn málsins er nú í höndum lögreglu. Arndís telur að þeir sem brutust inn í húsið hafi líklega vitað að þarna byggju hrædd og óörugg dýr. Hún hefur enn fremur áhyggjur af afdrifum kattanna.

„Það er auðvitað verst fyrir okkur að missa dýrin. Kannski eru þau slösuð eftir glerbrotin, maður veit það ekki,“ segir Arndís.

Leit að köttunum sem sluppu hófst strax í dag en hún hefur enn sem komið er ekki borið árangur. Arndís og meðstjórnendur hennar í Villiköttum láta þó engan bilbug á sér finna.

„Við hættum ekkert fyrr en við erum búin að finna þá.“