Zlatan með slitin krossbönd

Zlatan Ibrahimovic, framherji Manchester United, er með slitin krossbönd í hægra hné. Þetta er fullyrt í frétt ESPN.

Ef satt reynist snýr Zlatan væntanlega ekki aftur á völlinn á þessu ári.

Zlatan meiddist undir lok venjulegs leiktíma þegar United mætti Anderlecht í 8-liða úrslitum Evrópudeildarinnar í gær. United vann leikinn 2-1 og tryggði sér sæti í undanúrslitum keppninnar.

Leikurinn í gær gæti hafa verið síðasti leikur Zlatans fyrir United en hann hefur ekki enn skrifað undir nýjan samning við félagið.

Zlatan hefur átt frábært tímabil og skorað 28 mörk í 46 leikjum í vetur.