Vildu sér verðskrá fyrir aðkomufólk á Akureyri

Stjórn Akureyrarstofu vildi kanna þann möguleika að bjóða Akureyringum sérkjör á þjónustu í sveitarfélaginu. Vildi hún athuga hvort hægt væri að keyra tvær aðskildar verðskrár í bænum, eina fyrir Akureyringa og aðra fyrir íbúa annarra sveitarfélaga.

Bæjarlögmaður komst að þeirri niðurstöðu að þá væri líklega verið að mismuna fólki eftir búsetu. Tvö sveitarfélög hið minnsta reka aðskilda verðskrá fyrir íbúa sína.

Ástæða þess að Akureyrarbær óskaði lögfræðiálits á þessu er að sum sveitarfélög bjóða íbúum sínum sérkjör.

Bæði í Árborg og Vestmannaeyjum til dæmis fá íbúar sérkjör í sund.

Í Árborg fá börn og eldri borgarar frítt í sund en íbúar annarra sveitarfélaga þurfa að greiða fyrir þá þjónustu.

Sömu sögu er að segja úr Vestmannaeyjum.

Elliði Vignisson, bæjarstjóri í Vestmannaeyjum, segir af og frá að í Eyjum sé mismunað eftir búsetu.

„Þessi mannvirki eru greidd með skattpeningum íbúa í Vestmannaeyjum. Hér er ekki verið að mismuna eftir búsetu. Það er öllum frjálst að flytja til Vestmannaeyja,“ segir Elliði.

„Niðurstaða lögfræðiálits bæjarlögmanns var að ekki væri hægt að mismuna fólki á þennan hátt eftir búsetu,“ segir Þórgnýr Dýrfjörð, deildarstjóri Akureyrarstofu.

„Það er því ekki hægt að veita eingöngu Akureyringum kort af þessu tagi sem veitir þeim afslátt af þjónustu og afþreyingu. Því munum við líklega útbúa kort sem þetta en bjóða öllum þeim sem vilja að kaupa þá þessa þjónustu.“

Inga Þöll Þórgnýsdóttir, bæjarlögmaður á Akureyri, segist hafa komist að þeirri niðurstöðu að Akureyrarbæ sé ekki heimilt að mismuna fólki eftir því hvar það býr. Þjónustan sé fyrir alla og því eigi að bjóða öllum sömu kjör. Spurð út í gjaldskrár bæði í Vestmannaeyjum og Árborg segir Inga þær á gráu svæði.

Í beiðni um lögfræðiálit til bæjarlögmanns Akureyrar kom fram að tilgangur svokallaðs íbúakorts væri sá að greina íbúa frá gestum og keyra aðra verðskrá fyrir gesti bæjarins. Mögulegir staðir sem hægt væri að nota kortið á væri Hlíðarfjall, Amtsbókasafnið, Listasafnið, Gámasvæði fyrir sorp, Sundlaugar Akureyrar og almenningssamgöngur.

Einnig átti að skoða hvort Minjasafnið, Flugsafnið, Iðnaðarsafnið og Leikfangasýningin gætu verið innan sérkjara bæjarbúa.