Ingibjörg Sólrún segir sótt að lýðræði og mannréttindum úr ýmsum áttum

Ingibjörg Sólrún Gísladóttir segir ögrandi að takast á við styrkingu lýðræðis og mannréttinda í Evrópu um þessar mundir. En það sé helsta verkefni Lýðræðis- og mannréttindaskrifstofu Öryggis- og samvinnustofnunar Evrópu í Varsjá í Póllandi sem hún hefur nú verið skipuð framkvæmdastjóri yfir.

Þegar skipað er í stöðu sem þessa er horft á feril viðkomandi. Ingibjörg Sólrún Gísladóttir var borgarstjóri í Reykjavík í níu ár,  frá árinu 1994 til 2003. Hún settist á Alþingi árið 2005 og varð utanríkisráðherra árið 2007.

Eins og frægt er slitnaði upp úr stjórnarsamstarfi Sjálfstæðisflokksins og Samfylkingarinnar fljótlega eftir hrun bankanna í október 2008 en stjórnin fór frá hinn 1. febrúar 2009. Þá hafði Ingibjörg Sólrún glímt við töluverð veikindi.

Síðast liðinn fimm og hálft ár hefur hún unnið fyrir UN Women, fyrst sem sendifulltrúi í Afganistan og síðast liðin þrjú og hálft ár sem svæðisstjóri samtakanna í Istanbul í Tyrklandi.Skipað er í æðstu stöður hjá ÖSE til þriggja ára í senn. Ingibjörg Sólrún segist sjálf ekki hafa verið með augastað á framkvæmdastjórastöðunni.

„Það var eiginlega utanríkisráðuneytið sem vakti athygli mína á henni. Taldi að ég hefði þann bakgrunn sem gæti hentað mjög vel í þessa stöðu. Bæði minn pólitíski bakgrunnur og störf mín fyrir Sameinuðu þjóðirnar. Ég er líka búin að vera að vinna í Evrópu og mið-Asíu síðast liðinn þrjú og hálft ár,“ segir Ingibjörg Sólrún sem heldur til Varsjár í Póllandi í næstu viku á sinn fyrsta stóra fund á vegum Lýðræðis- og mannréttindaskrifstofunnar.

Áhrifamikil staða

Guðlaugur Þór Þórðarson utanríkisráðherra segir skipan Ingibjargar Sólrúnar fagnaðarefni enda um að ræða eina af áhrifamestu stöðum sem Íslendingur hafi gegnt á alþjóðavettvangi. Hún sé vel að stöðunni komin og hafi til að bera þá þekkingu og reynslu sem á þurfi að halda. En öll aðildarríkin 57 þurfa að samþykkja skipan í stöðuna.

„Ég er auðvitað mjög þakklát fyrir þann stuðning sem í þessu felst. En þetta er líka mikil ögrun því þetta er mikið jarðsprengjusvæði sem ég er að fara inn á,“ segir Ingibjörg Sólrún. Stóru verkefnin snúi að þróun og styrkingu lýðræðis í álfunni og kosningaeftirlit sé stór þáttur í starfsemi stofnunarinar sem hafi haft eftirlit með kosningum í fimmtán ríkjum á síðasta ári.

Þá segir Ingibjörg Sólrún stofnunina styðja við ríki til að taka á hatursorðræðu og hatursglæpum, meðal annars í samvinnu við lögreglu og saksóknara hér á Íslandi. Lýðræði og mannréttindum sé líka ögrað í vestur Evrópu með vaxandi populisma og flóttamannastraumi.

„Þetta er mjög ögrandi á þessum tímum sem við erum að lifa núna. Vegna þess að það er sótt að lýðræði og mannréttindum úr ýmsum áttum. En kannski einmitt þess vegna aldrei mikilvægara að standa vörð um þau og leggja aðildarríkjum ÖSE sem eru 57 talsins upp í hendurnar ákveðin tæki til að takast á við þessi mál,“ segir Ingibjörg Sólrún Gísladóttir.