Falsaðir 5.000 krónu seðlar í umferð á Suðurlandi

Lögreglunni á Suðurlandi bárust fimm tilkynningar í síðustu viku um að falsaðir fimm þúsund krónu seðlar hefðu verið notaðir til að greiða fyrir vörur og þjónustu á Selfossi og í Hveragerði. Þá segir í dagbók lögreglu að fleiri slík mál hafi komið upp í öðrum umdæmum á liðnum vikum.

Fólk er hvatt til að vera á varðbergi. Seðlarnir séu ágætlega prentaðir en við nána skoðun ætti fölsunin að vera augljós.

Þá leitar lögreglan vitna að árás sem átti sér stað aðfaranótt laugardagsins 23. september. Ráðist var á mann fyrir utan veitingastaðinn Frón og tannbrotnaði hann við árásina.

Frá 25. september til 1. október voru 42 ökumenn kærðir fyrir að aka of hratt. Tekið er fram í dagbókinni að í einu tilfelli hafi erlendur ökumaður tekið fram úr stórum og vel merktum lögreglubíl og svo tveimur öðrum bílum þar sem línan var óbrotin. Þar var um að ræða karlmann frá Mexíkó sem greiddi sekt sína á vettvangi.

Tveir voru stöðvaðir vegna gruns um ölvunarakstur og þrír vegna gruns um að akstur undir áhrifum fíkniefna. Tveir voru kærðir fyrir að aka hópbíl án þess að vera með ökumannskort í ökurita. Sex voru kærðir fyrir að tala í síma og ók einn ökumaður á handrið Ölfusárbrúar.

Hann stakk af en gaf sig svo fram fjórum tímum seinna. Í ljós kom að hann var ekki með bílpróf en ekki er talið að hann hafi verið undir áhrifum.