Próf týndust í pósti á leið til Austurríkis

Prófgögn í námi til löggildingar fasteigna- og skipasala við Háskóla Íslands týndust í pósti í maí á leiðinni til Austurríkis. Námsstjóri hjá Endurmenntun HÍ harmar að úrlausnir nemenda í áfanganum Fasteignakauparéttur hafi ekki enn fundist en þær voru ekki sendar sem rekjanlegur ábyrgðarpóstur.

Nemendur á fyrsta ári í námi Endurmenntunar Háskóla Íslands til löggildingar fasteigna- og skipasala þreyttu prófið þann 6. maí síðastliðinn. Rúmum þremur vikum síðar var þeim tilkynnt að gögnin hefðu ekki borist kennara námskeiðsins, en hann er búsettur í Austurríki. Í tölvupósti frá starfsmanni HÍ sagði að skólinn ynni í samstarfi við Póstinn við að finna prófgögnin. Af þessum sökum hefði ekki verið hægt að leggja mat á árangur nemenda og tilkynna um einkunnir í áfanganum. Rúmri viku síðar barst nemendum annað bréf um að starfsfólk HÍ og Póstsins væri þá enn engu nær.

„Það verður komin niðurstaða í málið fyrir helgi og þá munum við tilkynna um hana. Við erum búin að ráðfæra okkur við lögfræðinga og bindum enn vonir við að þetta finnist. En við gerum okkur grein fyrir að niðurstaða þarf að fást í málið og að við getum ekki beðið lengur. Okkur þykir þetta mjög miður enda hefur eitthvað líkt þessu aldrei komið fyrir áður,“ segir Erna Guðrún Agnarsdóttir, námsstjóri hjá Endurmenntun HÍ.

Erna segir að svo virðist sem mannleg mistök hafi leitt til þess að prófgögnin voru ekki send sem rekjanlegur ábyrgðarpóstur. Allar aðrar sendingar Endurmenntunar í gegnum tíðina hafi farið þá leið. 

Fréttablaðið ræddi við nemendur í áfanganum sem telja skólann hafa tekið sér of langan tíma til að komast til botns í málinu. Þeir benda á að sjúkrapróf fyrir þá nemendur sem komust ekki í prófið í byrjun maí, voru haldin 12. júní og að þeim hafi verið send stundaskrá fyrir haustönn þrátt fyrir að ekki sé ljóst hvort þeir uppfylli kröfu um fullnægjandi meðaleinkunn.