Kynslóð lætur í sér heyra

„Þetta er nýstofnuð kammersveit, við köllum okkur Elju. Við erum öll af sömu kynslóð, erum annaðhvort í námi erlendis eða höfum nýlokið námi. Okkur fannst vera tími til kominn að okkar kynslóð léti í sér heyra. Við höfum verið með þetta í bígerð í svona tvö ár, en erum nú loksins að fara að halda okkar fyrstu tónleika,“ segir Björg Brjánsdóttir, meðlimur hinnar glænýju sveitar Elju sem mun kveðja sér hljóðs í fyrsta sinn í kvöld. Bjarni Frímann Bjarnason er stjórnandi sveitarinnar og einn stofnenda en hann var nýlega ráðinn hljómsveitarstjóri Íslensku óperunnar. Tónleikarnir fara fram í gömlu kartöflugeymslunum í Ártúnsbrekku en rýmið er verið að gera upp og því verður breytt í hönnunar- og listamiðstöð sem verður opnuð í vor.

„Það er svolítið skemmtilegt að vera glæný hljómsveit í glænýju rými. Og þetta er auk þess mjög falleg staðsetning þannig að við erum spennt fyrir þessu.“

Hvað verður spilað í kvöld?

„Við ætlum að vera með ansi breitt prógramm – allt frá Haydn, klassískri sinfóníu yfir í kvikmyndatónlist eftir Mica Levi og við verðum líka með eistneskan kvartett eftir Helenu Tulve, sem er samtímatónskáld, og svo verður mjög hress konsert fyrir kammersveit eftir Stravinskí sem er nefndur eftir Dumbarton Oaks.“

Hvað er svo næst á döfinni hjá ykkur?

„Við stefnum á að vera með nokkur verkefni á hverju ári. Næstu tónleikar eru strax 7. janúar – þá komum við fram sem hluti af tónleikaröðinni Velkomin heim í Hörpu. Þá verðum við með aðeins minni kammerverk. Við spilum Brandenborgarkonsert númer fimm eftir Bach, en hann var mikil inspírasjón fyrir Strav­inskí í konsertinum sem við spilum á morgun, þannig að það er smá svona tenging á milli verkefna þar. Síðan verðum við með strengjakvartett eftir Báru Gísladóttur, sem er einmitt meðlimur í Elju, bassaleikari og tónskáld.“

Tónleikarnir hefjast klukkan átta í gömlu kartöflugeymslunum. Þess má geta að aukatónleikum hefur verið bætt við klukkan tíu.