Stage Dive Fest haldið í sjötta sinn í kvöld

Tónleikaröðin Stage Dive Fest verður haldin í kvöld í sjötta sinn. Tilgangur þessarar tónleikaraðar er að styðja unga tónlistarmenn í neðanjarðarsenunni í Reykjavík, aðallega í rapp- og raftónlist, þó að það sé ekki endilega nein krafa.

Fram koma Lord Pusswhip, en hann er einn aðstandenda hátíðarinnar og er nýlentur á Leifsstöð með alla búslóðina þegar þessi orð eru skrifuð en hann er að flytja aftur til landsins frá Berlín, sveitin Geisha Cartel og Krabba Mane. Í byrjun kvölds og á milli atriða þeytir hið dularfulla DJ-tvíeyki Domina­tricks gríðarlega sjaldgæfum skífum en þetta tvíeyki skipa þær Alpha Female og Hexía de Mix.

Ásamt Lord Pusswhip er það Mælginn og Bngrboy sem sjá um þessi kvöld. Í þetta sinn verður breytt eilítið til og verða leikar haldnir á Prikinu, en þessi hátíðahöld hafa yfirleitt farið fram á Húrra. Einnig verður frítt inn og er það vegna þess að jólin eru að ganga í garð og um er að ræða sérstaka jólaútgáfu af Stage Dive Fest. Sælla er að gefa en þiggja og allt það.

Meðal þeirra sem áður hafa komið fram á Stage Dive Fest eru rapparinn Mælginn, unglingarnir Smjörvi x HRNNR, stóru strákarnir í Geimfarar, villimaðurinn 101 Savage, Birnir þegar hann var ekki orðinn frægur, hinn elektróníski Kuldaboli, Countess Malaise og hinn dimmi og drungalegi Andsetinn.