Óttarr segir mál matreiðslunemans ömurlegt

„Þetta er ömurlegt mál og ekki í takti við vilja nefndarinnar þegar við vorum að vinna þetta,“ segir Óttarr Proppé. Hann var formaður þverpólitískrar þingmannanefndar sem samdi drög að nýjum útlendingalögum á þar síðasta kjörtímabili.

Kærunefnd útlendingamála hefur komist að þeirri niðurstöðu að víetnamski matreiðsluneminn Chuong Le Bui skuli ekki fá námsmannadvalarleyfi hér á landi. Ástæðan er sú að í nýjum útlendingalögum er iðnnám ekki skilgreint sem nám.

Óttarr segir að það hafi verið ætlun nefndarinnar að tekið yrði tillit til iðnnáms. „Þetta er lesið miklu þrengra af kærunefndinni heldur en við hefðum gert ráð fyrir í þingmannahópnum,“ segir Óttarr.

Óttarr segir að þingmannanefndin hafi lagt til að skipuð yrði nefnd til að fylgja lögunum og innleiðingunni eftir til þess að geta tekið á hnökrum sem fyrirsjáanlegt var að gætu komið upp á í þessari risastóru löggjöf. Sú nefnd hefur ekki verið skipuð. Óttarr leggur áherslu á að nýju Útlendingalögin séu gríðarlega flókin.

„Ég held að lagabókstafurinn sé vel yfir 100 síður,“ segir hann og bendir á að þetta sé með flóknustu og umfangsmestu lagasetningum sem hafi verið gerð. „Þannig að þrátt fyrir tiltölulega góðan undirbúning var alltaf vitað að við yrðum að læra af þessu og breyta hlutunum í framkvæmd.“

Á undanförnum árum hefur verið gripið til ýmissa ráðstafana, bæði í ráðuneytunum og á Alþingi til að bæta lagasetningu. En mistökin gerast enn. „Ég held að það hafi allt verið í rétta átt. Það hefur sömuleiðis verið byggt undir getu og styrk þingsins,“ segir Óttarr og bendir á að sérfræðiþjónusta á nefndarsviði hafi verið aukin.

„Það sem kannski hefur verið landlægt á Íslandi er að löggjöf hefur oft verið unnin hratt miðað við í Evrópu, þar sem hefur verið siður að lagabreyting hefur verið unnin í löngu ferli og jafnvel á nokkrum árum,“ segir Óttar.

Hann segir að margt hafi verið til fyrirmyndar við vinnslu nýju útlendingalaganna. Málið hafi verið unnið þverpólitískt og í samstarfi við þá sem vinna í faginu. „Það var að mörgu leyti til fyrirmyndar þó að kannski megi segja að í þessu tilfelli hefðu lögin orðið betri ef við hefðum verið einu til tveimur árum lengur að vinna ferlið. En það var bara eiginlega ekki í boði,“ segir Óttarr.

Óttarr segir Íslendinga vera að sumu leyti því marki brennda að vera fámenn þjóð með tiltölulega veikar stofnanir til að takast á við jafn flókin verkefni í lagasetningu og stærri lönd. „Það þýðir að við erum í mörgum tilvikum að reyna á þanþolið og getuna.“ 

Efast um að mistök hafi verið gerð

Nýju útlendingalögin voru unnin á þar síðasta kjörtímabili. Sigríður Andersen dómsmálaráðherra hefur sagt að sú skilgreining sem kemur fram á námi sé of þröng og miklu þrengri en löggjafarviljinn hafi staðið til. Í ráðuneytinu fer fram undirbúningur að breytingu á lögunum.

Brynjar Níelsson, þingmaður Sjálfstæðisflokksins, dregur í efa að um mistök hafi verið að ræða. „Ég er nú ekkert viss um að þetta hafi verið mistök. Ég held að þeir sem voru að semja þetta frumvarp hafi ekkert litið á nám nema háskólanám og starfsnám væri bara ekki þar inni í þeirra huga. En það kann að vera að þetta hafi verið mistök,“ sagði Brynjar í útvarpsþættinum Bítinu á Bylgjunni í gær.

Brynjar segist andvígur nýju lögunum. „Ég sagði að þau væru vanhugsuð og sat hjá við afgreiðslu þeirra. Enda óttast ég að þegar það kemur fram þverpóli­tískt frumvarp, þá sé það aldrei vænlegt til árangurs.“