Hugsanlegt að jarðhitavatnið komi úr Bárðarbungu

Sennilegt er að jarðhitavatn sem mælst hefur undanfarnar vikur í Jökulsá á Fjöllum eigi upptök vestar í Vatnajökli, hugsanlega í Bárðarbungu þar sem jarðhiti hefur aukist undanfarin misseri.

Þetta kemur fram í tilkynningu frá Veðurstofunni, en vísindamenn frá Jarðvísindastofnun, Almannavörnum og Veðurstofunni hittust í dag og fóru yfir stöðu mála vegna jarðhitavatns í ánni.

„Ljósmyndir sem teknar voru úr flugvél í gær (12. nóvember), sýna engin sérstök ummerki um að aukið rennsli jarðhitavatns komi úr Gengissigi í Kverkfjöllum. Á ljósmyndunum sést að töluvert vatn kemur undan Dyngjujökli í hefðbundinn farveg Jökulsár á Fjöllum vestan Kverkfjalla.

Sennilegt er því að jarðhitavatnið sem mælst hefur undanfarnar vikur eigi upptök vestar í Vatnajökli, hugsanlega í Bárðarbungu þar sem jarðhiti hefur aukist undanfarin misseri. Leiðnimælingar sýna að jarðhitavatn kemur enn fram í Jökulsá en vísbendingar eru um að það fari heldur minnkandi.

Ekki er að sjá breytingar í jarðskjálftavirkni í norðanverðum Vatnajökli samhliða útrennsli jarðhitavatnsins. Frekari mælingar til að finna uppruna jarðhitavatnsins verða gerðar við fyrsta tækifæri,“ segir í tilkynningunni.