Sextán ára stúlka stungin með hníf í skólastofu í Noregi

Sextán ára stúlka var stungin með hníf í skólastofu í Lier, vestur af norsku höfuðborginni Ósló, í morgun.

Norskir fjölmiðlar segja að stúlkan hafi verið flutt á sjúkrahús í Drammen með alvarlega áverka. „Ástandið er alvarlegt,“ hefur NRK eftir Rune Hunshamar hjá norsku lögreglunni.

Tilkynnt var um atvik í St. Hallvards skóla í morgun þar sem umrædd stúlka deildi við pilt, en stúlkan sneri að því loknu aftur til skólastofu sinnar. Nokkru síðar ruddist pilturinn inn í skólastofuna og stakk stúlkuna nokkrum sinnum.

Pilturinn flúði svo af vettvangi en varð síðar handtekinn. NRK segir piltinn vera nítján ára.

Kennari og samnemendur stúlkunnar urðu vitni að árásinni.