Grunur á að Shinawatra hafi flúið land

Grunur leikur á að fyrrverandi forsætisráðherra Taílands hafi flúið land eftir að hún mætti ekki til réttarhalda í dag.

Forsætisráðherrann fyrrverandi, Yingluck Shinawatra, er sökuð um að hafa tekið þátt í víðtæku spillingarmáli er varðar niðurgreiðslu hins opinbera til hrísgrjónaræktar.

Taílensk stjórnvöld hafa hert landamæraeftirlit til að freista þess að góma ráðherrann fyrrverandi.

Hin fimmtuga Shinawatra neitar sök í málinu sem kostað hefur taílenskan ríkissjóð marga milljarða króna.

Shinawatra varð árið 2011 fyrsta konan til að gegna embætti forsætisráðherra Taílands. Hún lét af störfum árið 2014.

Uppfært 8:18

BBC greinir frá því núna að samkvæmt heimildum hafi Shinawatra flúið land. Þetta er haft eftir ónafngreindum heimildarmönnum innan flokks Shinawatra.