Innlent

Úthúðar fyrrverandi í skilaboðum til vina og athugasemdakerfum fjölmiðla

Kolbeinn Tumi Daðason skrifar
Samkvæmt heimildum fréttastofu hefur maðurinn sent vinum konunnar skilaboð þar sem hann úthúðar sinni fyrrverandi sambýliskonu.
Samkvæmt heimildum fréttastofu hefur maðurinn sent vinum konunnar skilaboð þar sem hann úthúðar sinni fyrrverandi sambýliskonu. Vísir/Getty
35 ára karlmaður hefur verið ákærður af héraðssaksóknara fyrir stórfellt brot í nánu sambandi. Hann er sakaður um að hafa á alvarlegan hátt ógnað lífi, heilsu og velferð fyrrverandi sambýliskonu sinnar með ofbeldi, hótunum og frelsissviptingu. Árásin átti sér stað á heimili mannsins á höfuðborgarsvæðinu.

 Það var í maí í fyrra sem maðurinn réðst á konuna, að því er segir í ákæru héraðssaksóknara. Ýtti hann henni í gólfið, tók hana ítrekað kverkataki og þrengdi að öndunarvegi hennar. Tók hann fyrir vit hennar með annarri hendi, sló hana ítrekað í andlit og líkama, hélt henni niðri í gólfinu með báðum hnjám og sló ítrekað með olnboga í brjóstkassa. Ýtti hann andliti hennar niður í gólfið, beit í vinstri handlegg og reif í hár hennar.

 Á meðan á árásinni stóð hótaði hann konunni lífláti og svipti frelsi þegar hann meinaði henni útgöngu úr íbúðinni. Konan segist hafa ítrekað beðið um að fá að komast út og þegar hún komst að útidyrahurð á meðan árásinni stóð dró hann hana til baka. Þannig svipti maðurinn sambýliskonuna fyrrverandi frelsi í eina til tvær klukkustundir þar til hún komst úr íbúðinni og lögregla var kölluð á vettvang.

 Hlaut konan, sem er um þrítugt, miklar bólgur í andliti, sýnilega áverka í andliti í formi sokkins auga og brotinnar tannar. Þá hlaut hún mar um allan líkamann. 

 Samkvæmt heimildum fréttastofu hefur maðurinn sent vinum konunnar skilaboð þar sem hann úthúðar sinni fyrrverandi sambýliskonu. Þá hefur hann sömuleiðis gripið til ummælakerfis vefmiðla og farið ófögrum orðum um konuna.

 Málið hefur verið þingfest og neitaði maðurinn sök. Aðalmeðferð í málinu fer fram í haust. Lögmaður konunnar fer fram á að maðurinn greiði konunni tvær milljónir króna í miskabætur. 

Mest lesið


Fleiri fréttir

Sjá meira


×

Mest lesið