Franskir skátar sekir um glapræði og hugsunarleysi

Viðar Björgvinsson, formaður Björgunarsveitarinnar Kyndils á Klaustri segir að það hafi verið algert glapræði hjá erlendum skátum að reyna að vaða yfir Skaftá á þeim stað þar sem þeir reyndu það í gærkvöldi. Hann segir að björgunarmenn og skátarnir, hafi allir verið í hættu meðan á björgun þeirra stóð.

„Algjört glapræði og hugsunarleysi. Ekki þess virði að drepa sig fyrir þetta,“ segir Viðar samtali við fréttastofu 365.

Um var að ræða það að 10 franskir skátar á aldrinum 18 til 24 ára sem voru orðnir strandaglópar á hólma úti í miðri á. Var hlúð að þeim í fjöldahjálparstöð á Kirkjubæjarklaustri eftir að þeir komust kaldir og hraktir í land.

Viðar segir aðstæður hafa verið erfiðar. Björgunarsveitarmenn þurftu að vaða út í hólma til að bjarga skátunum hvar þeir voru strandaglópar úti í hólma. „Þau voru búin að fara þar yfir fyrr um daginn en það var búið að aukast það mikið í ánni þegar við komum. Þau komust ekki yfir. Þetta er mjög straumhörð á þarna. Og jökulköld. Þó það hafi verið 18 stiga hiti úti þá hafði það engin áhrif á ánna.“

Aðspurður segir Viðar að ekki hafi verið um það að ræða að aka út í hólmann. „Nei, við urðum að labba þarna einhverja 5 til 6 hundruð metra yfir hraun að ánni. Við komum engum farartækjum að og það tók okkur nokkurn tíma að átta okkur á því hvar fólkið væri.“

Og Viðar segir að talsverð hætta hafi verð á ferðum. „Það fer enginn maður vaðandi yfir Skaftá, það er nú bara þannig og allra síst þarna þar sem hún er mjög straumhörð. Mér leist ekkert á að fara að vaða Skaftá.“

Einn skátinn var svo fjær hópnum og það var ekki hægt að vaða til hans. Hann var sóttur með fulltingi þyrlu frá Landhelgisgæslunni.

„Já, það voru stórir álar sitthvoru megin við hann. Við gerðum tilraun til að vaða þangað en það var ekki fræðilegur möguleiki að komast að honum og það var bara þyrla eða jarðýta, sem kæmist þar að.“