Leikskólabörnum af erlendum uppruna fjölgað um 22%

Erlendum leikskólanemendum í Reykjavík fjölgaði um rúm 22 prósent á árunum 2011 til ársins 2016. Hinn 1. október árið 2011 voru þeir 1.072 en þeir voru orðnir 1.313 í október síðastliðnum. Voru þeir þá tæplega 20 prósent af heildar­fjölda leikskólabarna í Reykjavík.

Á leikskólanum Ösp í Breiðholti er hlutfall erlendra leikskólanemenda um 80 prósent. Sólveig Þórarinsdóttir, starfandi leikskólastjóri á Ösp, segir þessa þróun vera mjög hraða. „Reykjavíkurborg hefur sýnt stuðning en það má alltaf bæta í,“ segir Sólveig. Til að mynda fái leikskólinn peninga frá Reykjavíkurborg fyrir túlkaþjónustu. Það sé hins vegar mikil áskorun að takast á við það hve hratt fjöldi erlendra nemenda vex. „Það er að koma fullt af flóttafólki og það getur verið erfitt að vinna hlutina hratt,“ segir hún.

Sólveig segir að Reykjavíkurborg láti leikskólann hafa peninga fyrir túlkaþjónustu en ekki hafi þótt ástæða til að ráða túlk í fullt starf. „Þetta eru næstum 60 tungumál sem eru töluð og hvaða túlk á ég þá að taka,“ segir Sólveig. Hins vegar sé túlkur viðstaddur foreldraviðtöl og einnig sé reynt að ráða starfsfólk sem talar helstu tungumál. „Við erum til dæmis með pólskan starfsmann og það hjálpar ótrúlega mikið,“ segir Sólveig. Hún segir líka reynt að hafa skilaboð sem mest á myndrænu formi. „Við erum með matseðilinn myndrænan því þá er auðveldara að skilja hann og þá er fyrir neðan texti á íslensku og ensku,“ segir Sólveig.

Á leikskólanum Miðborg eru 120 börn og er rúmur helmingur barnanna af erlendum uppruna og yfir 20 tungumál töluð. Kristín Einarsdóttir leikskólastjóri tekur undir það að leikskólinn fái ágætan stuðning við að þjónusta börnin. „Auðvitað vilja allir fá meira,“ segir Kristín en segist jafnframt vera mjög sátt við að fá túlkaþjónustu, skólanum að kostnaðarlausu. „Það er mjög mikilvægt vegna þess að þú gætir ímyndað þér ef þú ættir barn á leikskóla í Póllandi hvernig það væri fyrir þig að vera í umhverfi sem þú skilur ekki neitt,“ segir Kristín. Hún segist nýta þann mannauð sem hún hefur eins og hægt er hverju sinni. „Það er starfandi pólskur grunnskólakennari og leikskólakennari frá Litháen,“ segir Kristín.