Hafþór grípur til varna og segir Thelmu fara fram með „ógeðfelldar ásakanir“

Aflraunamaðurinn Hafþór Júlíus Björnsson hefur birt á Facebook-síðu sinni tvær færslur þar sem hann segist ætla á næstu dögum að svara fyrir sig í ljósi viðtals Fréttablaðsins við barnsmóður hans, Thelmu Björk Steimann, sem birtust síðustu helgi.

Hann segir ásakanir Thelmu ógeðfelldar og segist vera að horfast í augu við að hann eigi við skapgerðarvandamál að stríða. Hann segir að margir hafi hvatt hann til að svara „mesta óhróðrinum“ strax.

Meðal þess sem Hafþór birtir er bréf frá konu sem var húsvörður á Nemendagörðum Fjölbrautaskóla Suðurlands (FSu) þegar hann Thelma bjuggu á görðunum árið 2007-2008. Hún segist aldrei hafa orðið beint vitni að líkamlegum átökum þeirra á milli en að hún hafi all nokkrum sinnum haft afskipti af þeim vegna skarkala og hrópa sem komu frá íbúð þeirra. 

„Þegar ég kom inn til þeirra voru þau bæði í talsverðu uppnámi, hún oft grátandi og hann reiður,” segir í bréfinu.

„Þau báru það bæði í samtölum við mig, bæði saman og sitt í hvoru lagi, að til ósættis hefði komið milli þeirra sem leiddi til handalögmála, þar sem hún hefði slegið hann og hann hefði bæði ógnað henni og slegið hana.

Þá sá ég stundum roða bletti á henni sem studdu mál hennar um að hann hefði slegið hana eða tekið fast á henni og hann viðurkenndi það að hafa gengið of langt, þótt hann kenndi oft um að hún hefði ögrað honum og byrjað. Hún sagði á móti að hann hefði ekki fengist til að ræða það sem ósættinu olli og sýnt henni ógnandi tilburði og yfirgang í staðinn. 

Ég ræddi við þau bæði um að það væri óásættanlegt að stíga yfir línuna milli erfiðra samskipta í tali og þess að fara út í líkamleg átök og að það væri ofbeldi þegar mun stærri aðili slægi þann burðarminni. Eins ræddi ég við þau um leiðir til að bæta samskiptin, en sá engan árangur af því.“

Hafþór kveðst líta svo á að þetta sanni ekki að samband þeirra hafi verið eins ofbeldisfullt og Thelma lýsir í viðtali við Fréttablaðið. Þá segir hann að ástæða fyrir „handalögmálum“ þeirra á milli sé sú að Thelma hafi átt það til að ráðast á hann.

Segir frásögn líklega uppspuna frá rótum

Önnur frásögn Thelmu sem Hafþór dregur í efa er frásögn hennar atburði eftir próflok um vorið 2008. Hún segist hafa farið á Hverfisbarinn og hitt Hafþór þar.

„Við Hafþór fórum að rífast og hann grýtti mér niður stigann á Hverfisbarnum. Fæturnir á mér voru allir úti í glerbrotum og ég var bara öll blóðug. Hafþór rauk hins vegar út af Hverfisbarnum og hvarf. Þegar ég náði í hann var hann kominn á Apótekið með vinum sínum og ég heimtaði að hann færi með mig upp á spítala. Það var svo á endanum þjónn á Apótekinu sem bara stimplaði sig út og fór með mig beint á spítalann,” segir Thelma.

Sjá einnig: Barnsmóðir Fjallsins stígur fram: Óttaðist um líf sitt við fyrstu árás

Fréttablaðið hefur undir höndum staðfestingu á þessari sjúkrahúsheimsókn en Hafþór segist aldrei hafa heyrt um þennan atburð eða ferð hennar á slysadeild fyrr en hann hafi lesið um hana í Fréttablaðinu síðastliðinn laugardag. 

Hann segir að hafi einhver hrint Thelmu niður stigann hafi það verið einhver annar en ég og veltir upp hugmyndinni að hún hafi “hreinlega dottið niður stigann.”

Hann heldur áfram og segir Thelmu hafa þolað illa áfengi. 

„Mér þykir annars langlíklegast að þessi frásögn Thelmu sé uppspuni frá rótum eins og flest annað í viðtalinu.”

Færslu Hafþórs má lesa í heild sinni hér fyrir neðan.