Innlent

Hafþór hyggst kæra en hvern er ekki vitað

Jakob Bjarnar skrifar
Lögmaður Hafþórs Júlíusar segir að verið sé að vinna í kærum á hendur þeim sem sett hafa fram ásakanir á hendur honum. Á myndinni er Hafþór með hund sem hann segir ástæðu ágreinings hans við þá konu sem lagt hefur fram kæru á hendur honum. Til hægri er Thelma Björk Steimann barnsmóðir Hafþórs.
Lögmaður Hafþórs Júlíusar segir að verið sé að vinna í kærum á hendur þeim sem sett hafa fram ásakanir á hendur honum. Á myndinni er Hafþór með hund sem hann segir ástæðu ágreinings hans við þá konu sem lagt hefur fram kæru á hendur honum. Til hægri er Thelma Björk Steimann barnsmóðir Hafþórs.

Hafþór Júlíus Björnsson kraftajötunn mun bregðast við þeim ásökunum sem hann stendur nú frammi fyrir, þá með kærum en ekki liggur nákvæmlega fyrir gagnvart hverjum þá. Þetta segir lögmaður Hafþórs í samtali við Vísi.

„Já, það verða örugglega lagðar fram kærur. En, hvernig að því verður staðið, það er í vinnslu. Rykið er ekki sest ennþá. Menn eru rétt að jafna sig á þessum ósköpum, sérstaklega þessu viðtali við barnsmóður hans um helgina. Þetta er nú ekki gaman fyrir neinn að fá á sig svona nokkuð,“ segir Kjartan Ragnars, lögmaður Hafþórs.

Hafþór vísar ásökunum um ofbeldi á bug
Umræddar kærur munu þá væntanlega beinast að þeim sem sett hafa fram ásakanir á hendur Hafþóri, blaðamönnum og fjölmiðlum sem greint hafa frá málinu.

Tvær konur hafa stigið fram og sakað Hafþór Júlíus um heimilisofbeldi. Ein kæra liggur fyrir en viðtal Snærósar Sindradóttur við barnsmóður hans, sem birtist á Vísi um helgina, hefur vakið mikla athygli. Sjálfur vísar Hafþór Júlíus þessum ásökunum alfarið á bug og kannast ekki við að hafa beitt neina unnustu sína ofbeldi.

Kjartan lögmaður vísar til Facebook-færslu Hafþórs þar sem hann gerir grein fyrir því hvernig málið horfir við sér. Vísir greindi frá þessu um helgina. Kjartan segir skjólstæðing sinn að sönnu kannast við það að þeim, honum og barnsmóðurinni, hafi komið illa saman og rifist sem hundur og köttur, en ekkert liggi fyrir um ofbeldi, engar skýrslur né nein vitni.

Engum styrktarsamningum rift
„Annars kemur þetta allt fram í Facebookfærslu Hafþórs. Hann á ekki gott með að segja meira í bili. Hann er í deilum við þessa barnmóður sína sem skrúfaði fyrir umgengni hans við barnið. Málið í þessu er að helsta fórnarlambið er átta ára gamalt barn í Kaupmannahöfn. Það finnst mér verst í þessu máli öllu,“ segir Kjartan og biðlar til þeirra sem um málið fjalla og tjá sig að sýna nærgætni.

Morgunblaðið sagði af því í morgun að styrktarsamningar í að minnsta tveggja fyrirtækja við Hafþór Júlíus væru til skoðunar í kjölfar þessa máls. Er fiskverslunin Hafið og veitingastaðurinn Gló nefndir í því samhengi. Kjartan segir að engum styrktarsamningum hafi verið sagt upp eða rift. Hafþór Júlíus hefur ekki fengið neinar tilkynningar um neitt slíkt. „Það er það eina sem ég get sagt að svo stöddu,“ segir Kjartan.


Tengdar fréttir

Hafþór Júlíus kærður til lögreglu af fyrrverandi kærustu

Þrjár fyrrverandi kærustur Fjallsins segja hann hafa beitt þær líkamlegu og andlegu ofbeldi auk þess að hóta þeim. Ein þeirra hefur kært nokkur atvik úr sambandi þeirra. Lögmaður Fjallsins segir ekkert hæft í sögunum og hótar Fréttablaðinu málsókn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.