Ráðuneytið segist ætla að vanda sig

„Við förum náttúrlega mjög vandlega yfir þessar athugasemdir og aðfinnslur og við munum taka tillit til þess við okkar vinnu í framtíðinni. Það er alveg augljóst,“ segir Benedikt Jóhannesson harðlega.

Í nýrri skýrslu Ríkisendurskoðunar er gagnrýnt að á árunum 2013 til 2015 hafi ráðuneytin varið um 2,5 milljörðum króna til kaupa á sérfræðiþjónustu. Í mörgum tilfellum voru kaupin ekki í fullu samræmi við lög, reglur og leiðbeiningar stjórnvalda.

Sérstaklega er gagnrýnt hvernig staðið var að viðskiptum við lögmannsstofuna Juris. Á tímabilinu greiddi ráðuneytið stofunni alls 107 milljónir króna, að stærstum hluta vegna þjóðlendumála. Samningur komst á með tölvupóstsamskiptum og í skýrslunni er gagnrýnt að ekki hafi verið staðið betur að samningagerð. Eftir að skýrslan kom út hefur verið bent á það í opinberri umræðu að eigendur Juris hafa margir gegnt trúnaðarstörfum fyrir Sjálfstæðisflokkinn.

„Við getum auðvitað ekki breytt því sem liðið er en við munum gæta okkar í framtíðinni. Ég vil samt leggja áherslu á að þarna er ekki verið að setja út á þessa ráðgjafa sem þarna eru heldur hvernig staðið er að samningum,“ bætir Benedikt við. Hann leggur áherslu á að lögmenn stofunnar hafi sérhæft sig í þjóðlendumálum en sú vinna sé að renna sitt skeið hjá ríkinu. Benedikt útilokar þó ekki að það verði samið aftur við stofuna. „En þetta verður í það minnsta gert með öðrum hætti.“