Filippseyingar velta Íslendingum úr sessi

Filippseyingar hafa velt Íslendingum úr sessi sem fjölmennasti hópur útlendinga á Grænlandi og Tælendingar eru við það að ná öðru sætinu af Íslendingum. Fjallað var um innflytjendur á Grænlandi í fréttum Stöðvar 2. 

Íbúar Grænlands eru nú um 56 þúsund talsins, þar af eru erlendir ríkisborgarar um tvö prósent íbúanna. Danir eru hins vegar ekki taldir með, frekar en Færeyingar, enda teljast þeir ekki til útlendinga á Grænlandi, þar sem þjóðirnar þrjár eru allar hluti danska konungsríkisins.

Því hafa Íslendingar undanfarna áratugi mælst í mannfjöldatölum sem fjölmennasti minnihlutahópurinn á Grænlandi. Þannig voru 204 íslenskir ríkisborgarar skráðir til heimilis á Grænlandi á síðasta ári og margir þeirra sennilega aðeins tímabundið vegna vinnu fyrir verktaka.

En nú hefur grænlenska ríkissjónvarpið vakið athygli á því að Filippseyingar eru búnir að velta Íslendingum úr sessi sem stærsti minnihlutahópurinn. Samkvæmt tölum hagstofu Grænlands voru 1.017 erlendir ríkisborgarar búsettir á Grænlandi um síðustu áramót, þar af 204 Filippseyingar. Fækkað hafði í hópi Íslendinga niður í 162, um fimmtung milli ára.

Þá vekur athygli að Tælendingar eru einnig við það að komast upp fyrir Íslendinga, 161 talsins í þriðja sæti. Síðan koma Svíar, Norðmenn og Þjóðverjar og þar á eftir Pólverjar og Bandaríkjamenn.

Mannfjöldatölurnar benda til að ríkisborgarar fátækari landa séu farnir að sækja til Grænlands, eins og þekkist í hinum norrænu velferðarríkjunum, þar sem innflytjendum bjóðast margfalt hærri tekjur en á eigin heimaslóðum. Landsframleiðsla á mann á Grænlandi er sambærileg við önnur Norðurlönd.  Mannvirki eins og verslanamiðstöðvar, veglegar íbúðabyggingar og opinberar þjónustustofnanir bera enda með sér að lífskjör á Grænlandi mæld í hagtölum eru í efri kantinum meðal þess sem þekkist meðal jarðarbúa.