Hvað gerir kona sem er búin að skila fullri starfsævi og sér fram á að þurfa að lifa á takmörkuðum eftirlaunum út ævina? Margar í hennar sporum myndu sjálfsagt minnka við sig, fara jafnvel í nýja og litla blokkaríbúð. Steinunn Svavarsdóttir ákvað hins vegar á þessum tímamótum að kaupa sér illa farið einbýlishús á Lollandi. Án þess að hafa séð það. “Þetta er algjör haugur,” segir hún og biður okkur lengstra orða að mynda ekki baðherbergið. Sem við auðvitað gerðum samt.



Steinunn er ein af þeim Íslendingum sem rætt er við í glænýrri þáttaröð Lóu Pind: “Hvar er best að búa?” Í þáttunum fer Lóa ásamt tökumanni til 6 landa og 7 borga í 3 heimsálfum að heimsækja íslenskar fjölskyldur sem ákváðu að slá til og prófa að búa í útlöndum. Fjórir þættir verða sýndir nú í maí en síðari hlutinn í haust. Í vor heimsækja þau hálfíslensk heimili snapchatdrottningar í Stuttgart, athafnakonu í Berlín, sjúkraþjálfara í Qatar og íslenskt par sem keypti gamlan skóla í Danmörku og eru að útbúa þar gistiheimili.



Reynir (sonur Steinunnar) og Ríkey í ævintýralega skólahúsinu í Danmörku eru heimsótt í fyrsta þættinum sem er á dagskrá stöðvar 2 kl. 19:55 í kvöld.



Umsjón og framleiðsla þáttanna er í höndum Lóu Pind Aldísardóttur, myndatökumenn eru Egill Aðalsteinsson og Friðrik Friðriksson, klippingu annast Ómar Daði Kristjánsson.