Lögreglan á höfuðborgarsvæðinu, í samstarfi við lögregluyfirvöld í Svíþjóð, hefur árangurslaust leitað að íslenskri konu um fertugt vegna gruns um að hún haldi sig í felum með son sinn í tilraun til að tálma barnsföður sínum umgengni við drenginn. Faðirinn, sem er sænskur, hefur hvorki heyrt né séð son sinn síðan í nóvember árið 2015. Drengurinn verður sex ára í mánuðinum.

Stjúpmóðir drengsins, Erika Nilsson, er stödd hér á landi í tilraun sinni til að vekja athygli á málinu. „Fjórtánda nóvember 2015 fékk maðurinn minn, Peter Bengtsson, sms frá barnsmóður sinni um að hún ætlaði sér að taka þriggja vikna frí með strákinn. Það stóð til að hann færi til pabba síns daginn eftir svo maðurinn minn sagði að það gengi ekki upp. Hún svaraði því til að hans álit skipti hana engu máli. Síðan þá höfum við ekki séð drenginn,“ segir Erika.

Að sögn Eriku var íbúð móðurinnar í Svíþjóð tæmd nokkrum dögum síðar. Hún hefur hvorki svarað síma né tölvupóstum og ekkert hefur spurst til hennar á Facebook. Faðirinn réð einkaspæjara fyrir 50 þúsund dollara á síðasta ári til að leita drengsins en án árangurs. Spæjarinn sagði að ef mæðginin dveldu hér á landi þá verðu þau tíma sínum innandyra.

Drengurinn er með sjaldgæfan sjúkdóm sem felst í því að hann meltir fitu ekki eðlilega úr mat. Þess vegna þarf hann sérstakt mataræði en Erika segir að móðir hans hafi alltaf haldið því fram að drengnum stafaði hætta af því að vera í umsjá föðurins. Aðeins hún kunni að meðhöndla sjúkdóminn. Erika segir það rangt mat, bæði læknar og félagsmálayfirvöld í Svíþjóð hafi komist að því að faðirinn sé fullfær um alla umönnun drengsins og að í umsjón hans hafi drengurinn dafnað vel. Síðastliðið sumar, eftir að drengurinn hvarf, hlaut faðirinn svo fulla forsjá yfir drengnum samkvæmt dómsúrskurði.

„Sænska lögreglan heldur að þau séu á Íslandi. Ástæðan er sú að fljótlega eftir að þau hurfu merkti Facebook hana í Kringlunni. Mikill meirihluti ættingja hennar er hér líka,“ segir Erika.

Lögreglan á höfuðborgarsvæðinu hefur farið með rannsókn málsins, síðan sænsk lögregluyfirvöld leituðu eftir samstarfi. Lögreglan telur nánast engar líkur á því að mæðginin dvelji hér á landi.