Umsóknum um vernd fjölgar umtalsvert

Áttatíu og fimm einstaklingar sóttu um alþjóðlega vernd á Íslandi í mars, til samanburðar sóttu 48 einstaklingar um vernd í sama mánuði á síðasta ári. Fjöldi umsókna á fyrstu þremur mánuðum þessa árs var samanlagt 223 eða rúmlega 60 prósent meiri en á sama tíma á síðasta ári að því er fram kemur í frétt á vef Útlendingastofnunar.

Það sem af er aprílmánuði hafa um 40 einstaklingar sótt um vernd og er heildarfjöldi umsókna á fyrstu 15 vikum ársins því kominn yfir 260. Áframhaldandi fjölgun umsókna það sem af er ári, samanborið við árið 2016, bendir til þess að heildarfjöldi umsókna um alþjóðlega vernd verði meiri í ár en í fyrra.

Umsækjendur í mars voru flestir frá Albaníu og Makedóníu, 54 prósent umsækjenda komu frá ríkjum Balkanskagans og voru 76 prósent umsækjenda karlkyns.

Fréttin birtist fyrst í Fréttablaðinu