Sprengja fannst við húsleit í Pétursborg

Lögregla í Pétursborg í Rússlandi fann sprengju við húsleit í íbúð í morgun, þremur dögum eftir að fjórtán manns létu lífið í sjálfsvígssprengjuárás í neðanjarðarlestarkerfi borgarinnar.

Í frétt BBC segir að þrír menn hafi verið handteknir og leiddir út í járnum.

Akbarzhon Jalilov, 22 ára Kirgisi, er grunaður um árásina á mánudaginn.

Húsleitin í morgun var gerð í Tovarichesky-hverfinu, austur af miðborg Pétursborgar klukkan 5 að staðartíma í morgun.

Lögregla kannar nú möguleg tengsl mannanna við hinn látna árásarmann.

Jalilov hafði haft íbúð á leigu í norðurhluta borgarinnar þar sem lögregla fann ýmis gögn og hluti sem talin er að geti hjálpað til við rannsókn málsins.