Ef Norðmenn hækka sig jafnmikið undir stjórn Lars og Íslendingar þá enda þeir í 2. sæti

Lars Lagerbäck er hættur við að hætta en hann er nú tekinn við norska fótboltalandsliðinu. Norðmenn búast við örugglega við svipuðum framförum og hjá íslenska landsliðinu undir stjórn Lars. Hækki norska landsliðið sig um jafnmörg sæti að það íslenska þá kæmi Lars Norðmönnum í hóp bestu landsliða heims.

Sjá einnig:Ég er alls enginn harðstjóri

Íslenska knattspyrnulandsliðið var í 104. sæti FIFA-listans þegar Svíinn Lars Lagerbäck var ráðinn þjálfari íslenska landsliðsins í lok ársins 2011. Á næstu rúmu fjórum árum fór liðið upp um 82 sæti á listanum og inn á sitt fyrsta stórmót þar sem Lars stýrði íslenska landsliðinu í síðasta sinn í átta liða úrslitum Evrópumótsins.

Norðmenn eru í 84. sæti nýjasta FIFA-listans og hækki þeir sig um jafnmörg sæti og íslenska landsliðið þá gæti þeir gert sér vonir um að komast alla leið upp í 2. sæti.

Sjá einnig:Lars Lagerbäck hlaut vel á þriðja tug atkvæða í forsetakosningunum

Það er auðvitað mun erfiðara að hækka sig um sæti inn á topp tuttugu en það verður engu að síður fróðlegt að fylgjast með ferðalagi Norðmanna á FIFA-listanum á næstunni.

Norðmenn þurfa þó að sýna þolinmæði, því íslenska landsliðið fór alveg niður í 131. sæti á fyrstu mánuðum Lars í starfi áður en Ísland fór að hoppa upp FIFA-listann.