Veittu harða ádrepu fyrir slæma umgengni en leyfðu þó rallýkeppni

„Gremja okkar er fólgin í því að vera að leggja peninga í að hefla veginn um leið og snjóa leysir og síðan er keppt á þessu í rallý og peningurinn fýkur út um gluggann,“ segir Sigurgeir Guðmundsson, formaður hálendisnefndar Rangárþings ytra.

Rallýkeppni fór fram í sveitarfélaginu 24. ágúst síðastliðinn.

„Það stórsér á sumum vegarköflum, sem rekja má til skriðs og hraðaksturs rallýbílanna. Á tveimur stöðum sást að bílar höfðu farið út af og var ekki séð að gengið hefði verið frá umhverfinu í sama horf og var fyrir keppni. Á einum stað voru steinar málaðir í appelsínugulum lit til merkingar á leiðum og er það mjög ámælisvert,“ segir í bókun hálendisnefndarinnar sem eyddi heilum degi í að skoða svæðið viku eftir að keppnin fór fram.

Fyrir fundi hálendisnefndarinnar lá að gefa umsögn um ósk um að haldið yrði svokallað Iceland All Terrain Rally 2017 um miðjan september. Mælti nefndin með að leyfið yrði gefið með ákveðnum skilmálum. Taka ætti gjald af keppnishaldara til að borg lagfæringar. Hins vegar var hætt við umrædda keppni.

„Algerlega skal komið í veg fyrir utanvegaakstur með merkingum sem auðvelt verði að fjarlægja að keppni lokinni. Allt rask skal afmáð og gengið frá svæðum í upprunamynd,“ segir meðal annars um skilyrði hálendisnefndarinnar.