Sextán ára stúlka með sjaldgæfan sjúkdóm fær að upplifa drauminn á Íslandi

Íslenskir ferðaþjónustuaðilar hafa látið draum sextán ára stúlku um að koma til Íslands rætast en hingað kom hún í gær og fær að upplifa landið með einstökum hætti.

Forsaga málsins er sú að í miðjan maí setti Margrét Inga Gísladóttir inn fyrirspurn á Facebooksíðuna Bakland ferðaþjónustunnar þar sem hún óskaði eftir hugmyndum um að ódýrum ferðum fyrir hina sextán ára Emily sem hefur lengi dreymt um að komast til Íslands en hún er frá Bandaríkjunum.

Emily þjáist af slímseigjusjúkdómi líkt og dóttir Margrétar en mæður stelpnanna eru saman í foreldrahópi á Facebook en dætur þeirra beggja þjást af sjúkdómnum. Sjúkdómurinn sem um ræðir er sjaldgæfur og í Bandaríkjunum er dýrt að vera með veik börn á framfærslu og vildi Margrét Inga gera eitthvað til þess að lyfta undir með fjölskyldu Emily.

„Ég fór svona eitthvað að leita en fann ekki mikið og setti bara inn fyrirspurn á Bakland ferðaþjónustunnar og viðbrögðin létu ekki á sér standa. Það voru bara endalaus boð um einhverjar ferðir og gistingu og alls konar, út að borða, þannig að þetta vatt upp á sig,“ segir Margrét Inga Gísladóttir.

„Við erum gagntekin af gestrisni allra hér á Íslandi,“ segir Donna Gray, ættingi Emily, sem er með í för.

Hingað er fjölskyldan komin og fær að upplifa Ísland á einstakan hátt.

„Mér skilst að við skoðum íshella á morgun. Síðan förum við á hestbak. Svo er það Bláa lónið og hvalaskoðun í dag,“ segir Emily Lawrence.

Af hverju vildir þú koma til Íslands?

„Í fyrstu var það landafræðin en svo lagðist ég í rannsóknir og fannst tilvalið að koma í heimsókn,“ segir Emily.

Móðir Emily sagði þau djúpt snortin af hugulsemi og gjafmildi ferðaþjónustuaðila sem buðu fram þjónustu sína.

„Við grétum talsvert um helgina þegar við fengum að vita þetta. Það er svo einstakt að frétta um allt sem okkur bauðst að gera. Fæst af þessu get ég boðið henni að gera. Hún er stundum svo heilsuveil að það er ekki hægt,“ segir Cheryl Lawrence, móðir Emily, sem einnig er með í för.

Fjölskyldan segir að bæði landið og þjóðin hafa uppfyllt allar væntingar.

Hvað með veðrið?

„Kalt. Það er mjög heitt heima þannig að það er dálítið skrýtið að þurfa að klæða sig svo mikið að sumri til,“ segir Emily.