Plast í vegagerð framtíðin?

Plast gæti verið framtíðin í vegagerð á Íslandi en með því að nota það gætu sparast hundruð milljóna í vegagerð. Rannsóknastjóri verkefnisins segir svo miklu plasti hent á Íslandi að aðeins hluti þess myndi geta byggt upp allt vegakerfið á Íslandi.

Samkvæmt upplýsingum frá Vegagerðinni er uppsöfnuð þörf til viðhalds á vegakerfi landsins um sextíu milljarðar. Íslenskt fyrirtæki vinnu nú að því að finna fram sparnaðarleiðir í þessum efnum en það er að nota útgangsplast til þess að búa til vegi á Íslandi.

Fyrirtækið heitir ReSource International og í verkefnum sínum leggur það fram nýjar aðferðir í umhverfisþekkingu og endurnýtingu auðlinda. Fyrirtækið hefur fengið styrk frá Vegagerðinni til þess að kanna möguleikann á nýtingu plastsins til vegagerðar en rannsóknir hafa staðið yfir síðast liðið ár.

Þessi aðferð er notuð annars staðar í heiminum, til dæmis á Indlandi en þar í landi eru um fimm þúsund kílómetrar vegakerfisins unnir á hverju ári með endannýtanlegu plasti.

„Við fengum staðfestingu í dag um að við gætum rannsakað þetta frekar. Sorpa styrkir nokkra meistaranema til að vinna að verkefninu og gera heildarprófanir á þessu.  Rannsóknarstofutilraunir fara fram og vonandi leggjum við líka vegspotta í tilraunaskyni til að prófa hugmyndina hér því hér eru aðrar aðstæður en annars staðar í heiminum.“ segir Jamie McQuilkin, rannsóknastjóri verkefnisins.

En það vakna spurningar eins og hvernig plastið kemur til með að virka hér á landi en veðrabrigðin hér á landi og í Indlandi eru ansi ólík.

„Ég tel að þetta muni bæta ástandið hér að vetri til því lausnin mun draga úr holuskemmdum samkvæmt niðurstöðum í vísindagreinum um efnið. Eins og allir sem aka á Íslandi vita leiða holuskemmdir á vegum til söfnunar vatns, hættulegra aðstæðna og útafaksturs þegar bílar fljóta upp. Þetta mun styrkja vegina og verða til góðs,“ segir Jamie.

Innan tíðar gætum við farið að sjá fyrsta vegkaflann sem byggður er upp með endurnýtanlegu plasti.

„Eftir 1-2 ár verða tilraunavegir lagðir og við rannsökum hvað gerist í raun við íslenskar aðstæður. Við getum tætt niður úrgangsplast og nýtt hið gífurlega magn ýmissa plasttegunda sem er oft brennt eða fer í landfyllingar. Hugsanlega má nýta þúsundir tonna. Um þessar mundir falla til yfir þúsund tonn af plasti á Íslandi sem gætu nýst í verkefnið, meira en fyrir allt vegakerfið,“ segir Jamie