Þurfa ekki lengur að framvísa skilríkjum á leið frá Danmörku til Svíþjóðar

Sænska ríkisstjórnin tilkynnti í dag að þeir sem ferðast frá Danmörku og til Svíþjóðar munu ekki þurfa að framvísa skilríkjum líkt og verið hefur frá ársbyrjun 2016.

Innanríkisráðherrann Anders Ygeman greindi frá þessu á fréttamannafundi síðdegis en sagði að nauðsynlegt væri að herða eftirlit sænsku lögreglunnar á landamærum Svíþjóðar. Þetta kemur fram í frétt SVT.

Sænsk stjórnvöld ákváðu að skikka fólk til að framvísa skilríkjum á leið sinni til Svíþjóðar vegna mikils straums flóttamanna til landsins árið 2015.

Hefur nú verið ákveðið að hverfa frá slíku eftirliti þar sem hælisleitendum hefur fækkað mikið á síðustu mánuðum, auk þess að mikil vandamál hafa skapast fyrir þá sem ferðast daglega milli landanna vegna vinnu.