Fyrirtæki aðlagi sig strax að breytingum

Fjárfestar og forráðamenn fyrirtækja ættu fyrr en seinna að taka stöðu loftslagsmála inn í myndina við ákvörðunartöku sína. Allt bendir til þess að á næstu árum muni kröfur um grænar áherslur, vegna hnattrænnar hlýnunar og loftslagsvandans, hafa mikil áhrif á rekstur fyrirtækja og fjárfestingar.

Nú þegar hafa stórfjárfestar breytt fjárfestingastefnu sinni vegna þeirra breytinga sem eru skammt undan, og felast ekki síst í nýjum loftslagssamningi sem undirritaður var af 195 þjóðum á ráðstefnu Sameinuðu þjóðanna í París í desember (COP21).

Í nýbirtri pælingu Hagfræðideildar Landsbankans um niðurstöður ráðstefnunnar og áhrif þeirra á efnahagslíf þjóða segir að ný markmið og reglusetningar á þessu sviði muni hafa víðtæk áhrif á atvinnulíf í heiminum fyrr en seinna – og næstu áratugina.

„Stjórnvöld munu líklega beina aðgerðum sínum að t.d. námu­rekstri, olíuvinnslu og orkufrekum iðnaði með reglum og aðgerðum sem munu fela í sér mikinn kostnað. Ekki er út í hött að ætla að þessar greinar og fleiri gætu lent í svipaðri stöðu og fjármálageiri heimsins lenti í eftir áföllin í alþjóðlegu fjármálakreppunni,“ og einnig segir að fyrirtæki sem framleiða eða nota mikið af jarðefnaeldsneyti gætu staðið frammi fyrir aukinni skattlagningu og íþyngjandi regluverki og einhver þeirra gætu staðið frammi fyrir því að geta ekki nýtt bókfærðar auðlindir sínar eins og kol og olíu í jörðu. Bent hafi verið á að til að hlýnun haldist undir tveim gráðum, eins og markmið loftslagssamningsins hljóðar upp á, þurfi þriðjungur af olíu-, helmingur af gas-, og meira en 80% af núverandi kolaauðlindum frá 2010 til 2050 að liggja áfram í jörðu um ókomna tíð.

Augljóst sé að fyrirtæki í námuvinnslu, þau sem framleiða raforku með kolum og fyrirtæki tengd olíuiðnaði búa við meiri áhættu vegna þessara þátta en ýmis önnur, sem komi til með að hafa áhrif á markaði með skuldabréf fyrirtækja.

Norski olíusjóðurinn bregst viðNorski olíusjóðurinn ætlar að selja í 120 fyrirtækjum sem nýta kol. Sjóðurinn ætlar að losa sig við hlutabréf að virði 850 milljarða íslenskra króna vegna breyttrar fjárfestingastefnu. Norska stórþingið hefur ákveðið að sjóðurinn eigi ekki eignir í fyrirtækjum þar sem 30% eða meira af tekjum falla til vegna kolaiðnaðar. Námufyrirtæki og orkufyrirtæki eru meðal þeirra.