Lúðvík stýrir rannsókn í máli Öldu Hrannar

Lúðvík Bergvinsson héraðsdómslögmaður og fyrrverandi alþingismaður er settur héraðssaksóknari í máli Öldu Hrannar Jóhannsdóttur aðallögfræðings Lögreglunnar á höfuðborgarsvæðinu sem hefur réttarstöðu sakbornings í tengslum við rannsókn á ætluðu broti hennar í starfi.

Bæði ríkissaksóknari og Ólafur Þór Hauksson héraðssaksóknari lýstu yfir vanhæfi til að fjalla um mál Öldu Hrannar eftir að málið kom upp en hún var send í ótímabundið leyfi frá störfum eftir að rannsókn á máli hennar hófst.

Rannsóknin lýtur að embættisfærslum hennar í tengslum við rannsókn á svokölluðu Löke-máli meðan hún starfaði hjá lögreglunni á Suðurnesjum en hún er grunuð um að hafa ekki fylgt ákvæðum lögreglulaga og sakamálalaga við rannsókn málsins.

Lúðvík Bergvinsson sagði í samtali við fréttastofu að rannsóknin væri í traustum farvegi en hann vildi ekki tjá sig um málið að öðru leyti að svo stöddu.