Ronaldinho hvattur til að spila með Chapecoense

Í dag hófst herferð á samfélagsmiðlum þar sem brasilíska goðsögnin Ronaldinho er hvattur til þess að ganga í raðir Chapocoense sem missti sína leikmenn í flugslysinu í Kólumbíu.

Stóru félögin hafa boðist til þess að lána félaginu leikmenn frítt og vilja koma í veg fyrir að félagið falli úr efstu deild. Það á leita allra liða til þess að hjálpa félaginu eftir þetta ótrúlega áfall.

Brasilískir knattspyrnuáhugamenn eru að nota myllumerkið #ronaldinhonachape á Twitter og þar dælast inn áskoranir á leikmanninn.

Ronaldinho hefur ekki spilað knattspyrnu síðan hann fór frá Fluminese á síðasta ári. Hann hefur aftur á móti verið að spila góðgerðarleiki um allan heim og er í ágætu formi. Hann er orðinn 36 ára gamall.