Alþingi samþykkti fullgildingu Parísarsamningsins

Alþingi samþykkti í dag að heimila fullgildingu Parísarsamnings Sameinuðu þjóðanna um loftslagsmál með öllum greiddum atkvæðum. Í tilkynningu frá utanríkisráðuneytinu kemur fram að Ísland sé þar með á meðal fyrstu 55 ríkjanna sem þurfa að fullgilda samninginn til að hann taki gildi.

Sigrún Magnúsdóttir umhverfis-og auðlindaráðherra undirritaði samninginn fyrir Íslands hönd fyrr á þessu ári en hann skuldbindur ríki heims til að vinna saman að því að bregðast við loftslagsbreytingum og áhrifum þeirra. Fyrr í þessum mánuði mælti svo Lilja Alfreðsdóttir utanríkisráðherra fyrir fullgildingu samningsins á Alþingi.

„Samningurinn markar sannarlega tímamót. Hann gefur okkur von um árangur í loftslagsmálum því í París tókst að finna hina pólitísku sátt sem lengi hafði vantað,“ er haft eftir Sigrúnu í tilkynningu ráðuneytisins.

Þá segir Lilja að það sé ánægjulegt að Ísland skuli vera í hópi þeirra ríkja sem staðfesta fullgildingu sína á Allsherjarþingi Sameinuðu þjóðanna nú í vikunni.

„Ég finn sterkt fyrir áhuga þjóða heims á Parísarsamningnum og hvað loftlagsmálin eru mikilvæg öllum þeim sem láta sig varða velferð í heiminum. Það er því sérstakt ánægjuefni að Ísland hafi lagt sitt lóð á vogarskálarnar," segir Lilja.

Samningurinn öðlast gildi þegar að minnsta kosti 55 ríki með 55 prósent af heimslosun hafa fullgilt hann. Nú þegar hafa 28 ríki sem bera ábyrgð á tæplega 40 prósent losunar heimsins fullgilt samninginn, þeirra á meðal Bandaríkin og Kína.

„Aðildarríki Parísarsamningsins setja sér markmið um minnkun losunar, svonefnd landsákvörðuð framlög, og myndar Parísarsamningurinn lagalegan ramma utan um þessar skuldbindingar. Ísland sendi inn sín markmið þann 30. júní 2015 þar sem stefnt er að 40% minnkun losunar gróðurhúsalofttegunda árið 2030, miðað við 1990, í samstarfi við aðildarríki ESB og Noreg. Endanlegar skuldbindingar Íslands ákvarðast af samningi þessara þriggja aðila. Stefnt er að því að þeirri vinnu ljúki á næsta ári,“ segir í tilkynningu utanríkisráðuneytisins.