Lifði af flugslysið og gæti spilað aftur

Einn af þeim sex sem lifðu af flugslysið í Kólumbíu gæti átt afturkvæmt inn á knattspyrnuvöllinn.

Helio Hermito Zampier Neto er 31 árs varnarmaður Chapecoense og einn af þeim sex sem lifðu af slysið sem varð 71 manni að bana.

Hann er í stöðugu ástandi eftir að hafa farið í aðgerð á lunga, hné og höfði. Faðir Neto er eðlilega himinlifandi með að sonur hans sé á lífi.

„Sonur minn er allur að braggast. Hann er búinn að fara í aðgerð og læknirinn segir að hann muni geta spilað fótbolta á nýjan leik,“ sagði faðirinn.

„Við munum halda áfram að biðja því við þurfum að fá hann af spítalanum og heim til sín.“

Markvörðurinn Jakson Ragnar Follmann missti hægri fótinn í slysinu en mun halda vinstri fætinum.