Wilshere var á leiðinni til Roma þar til Bournemouth opnaði veskið

Jack Wilshere, landsliðsmaður Englands í fótbolta, átti ein af óvæntustu félagaskiptunum á lokadegi félagaskiptagluggans en hann fór þá á láni til Bournemouth sem hélt sæti sínu sem nýliði á síðustu leiktíð.

Samkvæmt frétt Daily Mail var ekki fyrsti kostur hjá Wilshere að fara til Bournemouth heldur vildi hann fara til Roma á Ítalíu. Það stefndi allt í að hann færi til ítölsku höfuðborgarinnar eftir viðræður við Franco Baldini sem er ráðgjafi Rómverja.

Þrátt fyrir að vera ekki viss um mikinn spiltíma hjá Roma sem hefur á að skipa sterkri miðju var Wilshere staðráðinn í að fara þangað en Arsenal kom í veg fyrir það. Ástæðan var fjárhagslegs eðlis.

Crystal Palace, Bournemouth, Roma og AC Milan lögðu öll fram lánstilboð í enska landsliðsmanninnn og eftir að fara yfir þau öll ákvað Arsenal að taka tilboði Bournemouth sem opnaði veskið upp á gátt til að landa Wilshere.

Eddie Howe, knattspyrnustjóri Bournemouth, vildi ólmur fá leikmanninn í sínar raðir þannig félagið borgaði Arsenal tvær milljónir punda fyrir leiguna og bauðst til að taka yfir allan launapakka Wilshere út tímabilið en hann fær 80.000 pund á viku.

Peningarnir eru svo miklir í ensku úrvalsdeildinni eftir nýja sjónvarpssamninginn að lið sem er nýkomið upp í deildina og spilar á 10.000 manna leikvangi getur boðið svona upphæðir á meðan ítalski risinn þurfti að bakka út.

Wilshere spilar væntanlega sinn fyrsta leik fyrir Bournemouth um þarnæstu helgi þegar það tekur á móti West Bromwich Albion en liðið er án sigurs með eitt stig eftir fyrstu þrjár umferðirnar.